Uzulu weMatabeleland South uthi inkomo ezabelwe izakhamizi nguMongameli Emmerson Mnangagwa eGwanda phansi kohlelo lweCommand Livestock ziphiwe abasekeli bebandla leZanu PF kuphela.
“Sifuna ukuthi linothe; asisafuni umuntu ongumyanga, angithi! This is the program,” kutsho uMongameli Mnangagwa esipha abantu inkomo lezi ngoLwesihlanu.
Iziphathamandla zeZanu PF ezingosaziwayo ezithole lezinkomo zigoqela uMnu Abedinico Ncube, uNkosazana Rennie Kibi, uMnu Japhet Dube loNkosazana Sizile Mpabanga.
Isakhamuzi seBethel uMnu Reason Moyo utshele iStudio 7 ukuthi uhlelo lweCommand Livestock lungabe luqondile kodwa indlela lezinkomo ezabiwe ngayo iyasolisa.
“Khonokhuyana ukuthi uMnangagwa usuke wabambanisa ukupha abantu inkomo lomhlangano wakhe awenzele ePhelandaba ngezinye indlela sisuka sizibuze ukuthi ebelenjongo yokunikeza abantu inkomo kumbe ubefuna ukuthi asondeze abantu eduze ukuthi bamvotele esingathi ngeyinye indlela yivote buying,” kutsho uMnu Moyo.
Kodwa omunye wabathole lezinkomo uMnu Ephraim Dumani uthe kavumelani lalumbono. Wengeze wathi uhlupho yikuthi uzulu kathatheli phezulu inhlelo zikahulumende.
“Abantu sibulawa yikuthi asifuni ntshintsho olubakhona ngesikhathi esifaneleyo so yikho okwayenza abanye abantu badonda ukungena kuCommand Livestock,” kutsho uDumani.
