Ibandla leNational Patriotic Front lithi kulelunga lalo elitshiselwe indlu ngabantu abanakanelwa ukuthi ngabasekeli beZanu PF eHurungwe East ngoLwesihlanu.
Oncintisa emele iNPF esigabeni lesi, uNkosikazi Sarah Mahoka uthi indlu kaMnu Cypren Kademukombe le itshiswe ebusuku kulabantwana abalele phakathi.
Kodwa uthi baphange bahlengwa. Ibandla leli libikwa lisekelwa ngowayenguMongameli uMnu Robert Mugabe, umkakhe lamanye amalunge eG40.
UMahoka uthi abasekeli bebandla lakhe sebehlalela evalweni esigabeli eHurungwe East ngokwethuselwa ngamalunga eZanu PF.
Kodwa uthi udlakela lolu kalubethusi; ngakho uthi uzaqhubeka ngomkhankaso wakhe.
“Abantu beZanu PF bayesaba ukuthi sesibadlile kudala singakavoti, yikho nje betshise indlu ka-chairperson wethu,” kutsho uMahoka.
Umsakazo weStudio 7 uzamile ukukhuluma leziphathamandla zamapholisa, uNkosikazi Charity Charamba loMnu Paul Nyathi ngaloludaba kodwa bebengadobhi incingo zabo.
Isikhulumeli sebandla leZanu PF uMnu Simon Khaya Moyo laye ubengadobhi olwakhe.
Ingcwethi ecubungula ezombusazwe uMnu Effie Dlela Ncube usole loludlakela.
“Yinto embi kakhulu leyo emele ikhangelisiswe ngamapholisa edinge labo ababangele udlakela lolu babotshwe,” kutsho uMnu Ncube.