amalinks wokungena

Breaking News

Inkokheli Yamabandla Ezombusazwe Ipha Isiphundu Abasekeli Abase Botswana


MDC Alliance Rally

Abanye abeZimbabwe abahlala kweleBotswana bathi amabandla ezombusazwe abatshiye ngaphandle ngesikhathi bekankasela amavoti okhetho lukamhlaka 30 Ntulikazi. EleBotswana lilenani eliphezulu labantu abeZimbabwe, kodwa akula nkokheli yamabandla akhankasayo esike yafika ukuzokhuluma labo.

Amabandla afana leleZANU PF kanye le MDC Alliance aseke aphuma phandle kwelizwe ukuyakankasa emazweni anjenge South Africa kanye le United Kingdom, kuyindlela yokunzama ukuqinisa amathuba okunqoba kukhetho oluzayo.

Noma nje abangaphandle kwelizwe bengasoke bevunyelwe ukuvota besemazweni abahlala kuwo, amabandla amanengi abona kuqakathekile ukufikisa umlayezo ngoba labo beqakathekile ekubeni lesabelo kundaba zelizwe labo.

Inengi elingaphandle kwelizwe lithumela imali enengi encedisa ukubamba umnotho welizwe, njalo labo balakho ukukhuthaza izihlobo kumbe abangane abasekhaya ukuthi bavotele liphi ibandla.

Akukhangelelwanga ukuthi abahlala kubo Bhilithani bephaphe baye ekhaya ukuyavota, noma nje amanye amabandla akhankasa kulelizwe. Okumangalisa abanye abaseBotswana yikuthi amabandla wonke kazange azihluphe ngokuchapha uRamokgwebana, engena kweleBotswana ukuzo khankasa.

Unkosazana Ireen Dube uthi indawo ezifana leFrancistown ziseduze leZimbabwe, njalo zilabantu abekhaya abanengi obekumele kukhange amabandla akhankasela ukhetho…

"Ungakhangela, iFrancistown iseduze lendawo ezinengi eMatebeleland kanye lakoBulawayo. Sibona ama politicians ephapha esiya kubo UK, eseqa abantu abangenelisa ukuvota eBotswana. Abantu abase UK, amathuba abo okuthi bahambe bayevota amalutshwana, uma ukhangela lomuntu okusuka, sithi, eFrancistown esiya vota ePlumtree," kutsho uDube.

Abanye njalo bathi eleBotswana alikaze libeyindawo etshingisa ukuthakazelela kakhulu ezepolitiki njengokwenziwa ngabeZimbabwe eSouth Africa.

Umnunzana Desmond Ncube uthi mhlawumbe abeZimbabwe eBotswana kumele betshengise isifiso lolwazi langendaba zezombusazwe, kukhanye ukuthi basekela liphi ibandla ukuze bakhange abakhankasayo…

"Mhlawumbe asibonakali kakhulu sitshutshiseka ngeze politiki, okwenza amabandla ezombusazwe angakuboni kufanele ukuthi bezothengisa imilayezo yabo kithi. Kodwa noma kunjalo, kumele babuye bona, angithi yibo abadinga inhlanzi, bezositshela ukuthi bazasenzelani ukuze sibavotele," kutsho uNcube.

Unkosikazi Sandile Tshuma, yena osebenza eGaborone, uthi amabandla akhankasayo kumele abone ukuthi ayafinyelela abantu ngobunengi, ikakhulu ngoba abeZimbabwe abaseBotswana besenelisa ukuya ekhaya ukuyavota ngoba kuseduze…

"Kuyadanisa ukuthi awuboni ngitsho lomuntu kumbe ibandla elilodwa lizama ukuzokhanga abavotayo abahlala kweleBotswana. Ngitsho lamabhakani wokukhansa awakho, endaweni ezinjengemngceleni uma ungena eZimbabwe,” kutsho uTshuma.

Ngaphambi kokhetho olwabanjwa ngo 2013, kwakulenhlanganiso kanye lamaqembu ezombusazwe ayesekela amabandla athile ekhaya. Kodwa abanye ababekhokhela lezinhlanganiso sebabuyela ekhaya kukanti abanye baphela amandla, okwenza amabandla ekhaya engatholi abantu angangena ngabo uma efuna ukuzo khankasa.

Facebook Forum

XS
SM
MD
LG