Abakhokheli bamabandla amabili ahamba phambili ngosekelo abalisa eleZanu PF lomanyano weMDC Alliance baqhubeka bethembisa ukuvuselela umnotho welizwe alubana bethe banqoba kukhetho.
Lanxa uMongameli Emmerson Mnangagwa ehlulekile ukuwuvuselela kusukela nyakenye engena embusweni, uthi uzakwenelisa lokhu enganqoba.
Kodwa uMnu Nelson Chamisa uthi uMnangagwa wehlulekile nanku imali iqhubeka isilela elizweni kanti lemisebenzi layo kayitholakali.
Ngokunjalo uMnu Chamisa uthi nguye yedwa ongenelisa ukuvuselela umnotho uzulu weZimbabwe abe enhlalakahle.
Sibuze ingcwethi ecubungula ezombusazwe uMnu Innocent Batsani Ncube ukuthi ngubani phakathi kwababili laba abona esenelisa ukuwuguqula umnotho.
UNcube uthe lanxa bobabili bekhanya bephicwa ngendlela umnotho osebenza ngayo, ubona uChamisa engenza ngcono kuloMnangagwa.
