Umkhokheli weMDC-T uNkosazana Thokozani Khupe ucele uzulu weZimbabwe ngoMgqibelo ukuthi avotele ibandla lakhe.
Ekhuluma emhlanganweni awenzele eAmpitheater, uMaKhupe uthe ibandla lakhe yilo lodwa elingenelisa ukulungisisa zonke indubo ilizwe elibhekane lazo linganqoba.
“Besicela ukuba uNkulunkulu asikhokhelele kukhetho njalo ngicela ukuba abantu bangivotele,” kutsho uNKosazana Khupe.
Ubonge abasekeli bakhe ngokuma laye ngaso sonke isikhathi. Ngokunjalo, uthe sokuyisikhathi sokuthi bamfake eState House ngevoti abe nguMongameli weZimbabwe.
Wengeze wathi ibandla lakhe yilo lodwa elingavuselela umnotho welizwe kanye lamafekithali aqhubeka evalwa phambi kombuso weZanu PF.
Umginisihlalo weMDC-T koBulawayo, uNkosikazi Nomvula Mguni uthe bayathokoza ngosekelo abalalo njalo balethemba ukuthi bazanqoba.
“Sijabulile ngosekelo esiluthole lamhlanje ebantwini njalo sikhangelele ukunqoba,” kutsho uMaMguni.
Odinga ukumela isigaba seLuveve edale lephalamende uNkosikazi Thamani Moyo laye ukhuthaze uzulu ukuthi avotele uMakhupe ngbunengi.
“Lilanga lethu lokucina lokukhankasa lamhlanje lokhe kulokuthula sikhulekile njalo ngicela abantu beZimbabwe bavotele uDokotela Khuphe ukuba kubelenuquko enhle ezweni,” kutsho uMaMoyo.