Ibandla leZanu PF liyakhokhela kumpumela yokhetho lokudinga amalunga edale lephalamende ebisiyethulwe yiZimbabwe Electoral Commission ngoLwesibili ntambama.
Phakathi kwezabelo ezingamatshumi amane lasitshiyagalombili esezethulwe yiZEC, iZanu PF inqobe ezigabeni ezingamatshumi amathathu lasithupha.
Umanyano weMDC Alliance unqobe kwezilitshumi lanye kwathi esisodwa isihlalo saya kubandla elitsha elibikwa lisekelwa nguMnu Robert Mugabe eleNational Patriotic Front.
IZanu PF ikhanya inqoba ngezinga eliphezulu, ikakhulu emaphandleni ezigabeni ezifana leChiredzi South, Chiredzi West, Gutu South, Mutare North, Muzarabani South, Murehwa North lezinye.
IMDC Alliance yona inqobe ezigabeni ezifana leChipinge West, Chipinge East, Kadoma Central, Mutare Central, Chinhoyi, Maronder Central, Hwange East, Hwange West, Makokoba leGwanda Central.
Isigaba seKwekwe Central siye kubandla leNPF. Oncintise emele lelibandla uMnu Matambanadzo Masango, yena owaxotshwa kuZanu PF esetheswa icala lokuba lilunga leG40 unqobe obemela iZanu PF lobemela iMDC Alliance uMnu Blessing Chebundo.
Idale lephalamende lilezihlalo ezingamakhulu amabili letshumi elilodwa, okutsho ukudi usamude umango ekuthini kwaziswe impumela yezihlalo zonke.
Kodwa ingcwethi kwezombusazwe uMnu Zenzele Ndebele utshele iStudio 7 ukuthi impumela esisemphakathini le ingaba iveza ukuthi ibandla leZanu PF lizanqoba.
