amalinks wokungena

Breaking News

Kanti Kungani AmaTonga eBinga Engavoteli iZanu PF?


Imizi yeBinga

Isigaba seBinga, lapho okudabuka khona abolimi lwesiTonga, ngesinye sezigaba zelizwe ezingakaze zivotele ibandla leZanu PF lanxa sokutheni.

Omela isigaba se Binga North, uMnu. Prince Dubeko Sibanda owangena ngomnyaka ka 2013 uthi wabona kuqakathekile ukuthi engabi liluga ledale elihlala lise Harare kuphela.

Uthi kathesi ekhankasa bekulula ngoba ubekhumbuza uzulu ngezithembiso zakhe njalo lokuthi sebefike ngaphi ngenhlelo zakhe ebakhumbuza ukuthi bengabi ngabantu abakhangelelwa phansi.

USibanda uthi okubangela ukuthi abantu be Binga bengavoteli ibandla leZanu PF yikuthi izandla ziyagenzana okutsho ukuthi iZanu PF yona kayifuni kugeza abantu be Binga.

"IZanu PF ibusile kusukela ngomnyaka ka 1980 sokuze kube yiminyaka phose engamatshumi amane ilokhu ibusa. Asikaze sizwe ukuthi kulominister kumbe oyedwa okhethiweyo ngu president we Zanu PF," kutsho uSibanda.

Uthi akula ngitsho lomuntu oyedwa olesikhundla saphezulu owake wakhethwa nguhulumende. Njalo uthi ezinye izigaba ziyathuthukiswa kodwa isigaba se Binga sona sisalela emuva.

Uthi umgwaqo odabula eBinga usiya eGokwe wafakwa ithara kusiyafika esigabeni seMidlands okulabantu abakhuluma isiShona kodwa lapho ufika eBinga watshiywa ulubhuqu.

"Ngamafitshane iZanu PF ayikaze isihloniphe njengabantu besiTongeni ngalokho ke angiboni ukuthi lathi singaba lesizatho sokuyihlonipha njalo siyithande," kutsho uSibanda.

Uthi nxa kuyikuthi ibandla leMDC-T ingathatha umbuso bathembe ukuthi lelibandla lizabananza, esithi njengesibonelo omela isigaba seBinga South, uMnu. Joel Gabhuza wakhethwa ngumuyi uMnu. Morgan Tsvangirai ukuba ngumphathintambo, okwaba ngokwakuqala ovela eBinga.

Uthi okunye okwenzakalayo yikuthi ababusayo bandise ukuthi abakhokhelayo babe ngabesiShona besekelwa ngabe Sindebele kungela owesiTonga, Nambya, Khalanga kumbe ezinye indima.

Facebook Forum

XS
SM
MD
LG