Ukuthethwa kodaba lwempumela yokhetho lukaMongameli olukhwezwe ngumkhokheli weMDC Alliance uMnu Nelson Chamisa kuqale namuhla emthethwandaba weConstitutional Court njalo kuyaqhubeka.
Igqwetha likaChamisa uMnu Thabani Mpofu utshele inkantolo ukuthi kwaba lokuqilibezela okwenziwa yiZimbabwe Electoral Commission isebenzelana loMongameli Emmerson Mnangagwa okwabangela ukuthi uMnangagwa anqobe.
UMpofu uthe njalo amanani akumaV11 Forms aveza ukuthi uChamisa wanqoba.
Wengeze wathi uMongameli Mnangagwa ngokwakhe wasebenzisa ukudla lezifuyo ayehamba ezabela uzulu wemaphandleni ngaphambilini kokhetho ukuthenga amavoti.
Abahluleli bake bavivinya uMpofu kabuhlungu besithi kungani uChamisa waphuza ukupha uMnangagwa amaphepha akhe kuphikisa impumela yomthethwandaba.
Uphendule wathi isithunywa somthethwandaba yiso esaphuzayo, hatshi bona.
UMpofu uphe ubufakazi bogwalo lweEuropean Union bona athi bukhomba ukuthi ukhetho kalwenziwanga ngemfaneo kwezinye indawo.
Kodwa uthwaliswe gadalala ngumahluli omkhulu uMnu Luke Malaba esithi kumele atsho ukuthi lokhu kwenzakala kuwaphi amapolling stations kahle-kahle.
Akenelisanga ukukwenza lokho uMpofu.
Igqwetha likaMongameli Mnangagwa uMnu Lewis Uriri ukulandule ukuthi kwaba lokuqilibezela esithi uChamisa kalabo ubufakazi.
“Yebo, kuliqiniso ukuthi amanani kaqambi manga. Kodwa kuloludaba amanani amele akhangelwe ngaweZEC. Abukho ubufakazi bkuqilibezela ungakhangela amanani lawa,” kutsho uMnu Uriri.
Elinye njalo igqwetha likaMnangagwa uMnu Thembinkosi Magwaliba utshele umthethwandaba ukuthi uChamisa wehlulekile ukwethulela inkundla ubufakazi obungenza impumela yokhetho yesulwe.
“Siyakubeka phambi komthethwandaba ukuthi uChamisa kalabo ubufakazi. Akatsho lokuthi waqilwa ngamavoti amangaki,” kutsho uMagwaliba.
Uchothoze njalo ingcwethi kwezamanani eyasetshenziswa nguChamisa ekuqoqeni ubufakazo bokuqilibezela uDr Otumba Edgar Ouko esithi uyingcwethi kwezokuntshenza kwenhlanzi lezimfe kuphela hatshi amanani.
Luyaqhubeka ngokuthethwa loludaba.