Umkhokheli weMDC Alliance uMnu Nelson Chamisa namuhla uhlangane labameli bamazwe athuthukileyo eZimbabwe abalisa eleBhilithane, eleMelika leleGermany bekhulumisana ngodaba lokhetho kanye lengqubelaphambili edingakalayo ukuze ilizwe lithuthuke.
Amazwe womathathu la athi kumele kube lokukhulumisana phakathi kukaMongameli Emmerson Mnangagwa loChamisa bathole isisombululo kungxabano yabo phezu kwempumela yokhetho.
UMnu Chamisa laye uthi ukukhulumisana kuyadingakala ukuze kulungisiswe indlela ezombusazwe eziqhutshwa ngayo elizweni njalo kuguqulwe imithetho yezokhetho ukuze eleZimbabwe liphumelele.
Embikweni awethule ekufungisweni kwakhe ngeSonto uMongameli Mnangagwa uthe izanda zakhe zivulekile kuChamisa nxa efuna ukusebenza laye.
Kodwa akatshono ukuthi bengasebenzelana ngayiphi indlela.