amalinks wokungena

Breaking News

UMnangagwa Ubumba Ikomishini Ezacwayisisa Udlakela Olwalandela Ukhetho


UMongameli Emmerson Mnangagwa ngoLwesithathu ukhethe ikomishini ezakwenza uphenyo phezu kodlakela olwaba khona eHarare ngemva kokhetho olwabangela ukubulawa kwabantu abayisithupha ngamasotsha.

Ikomishini le ilamalunga ayisikhombisa njalo ikhokhelwa ngowake waba nguMongameli weleSouth Africa uMnu Kgalema Motlanthe.

Amanye amalunga ayo ayizizalwane zakwamanye amazwe abalisa uMnu Rodney Dixon owakweleBhilithane, uMnu Emeka Anyaoku oweNigeria, loMnu Davis Mwamunyange oweTanzania.

Amalunga ayinzalo yeZimbabwe abalisa abafundisa ekolitshini leUniversity of Zimbabwe uNkosikazi Charity Manyeruke njalo owaziwa ngokusekela ibandla leZanu PF loMnu Lovemore Madhuku, onqotshwe kukhetho lukaMongameli.

Ilunga lokucina ngowake waba ngumkhokheli wenhlanganiso yamagqwetha, iLaw Society of Zimbabwe, uNkosikazi Vimbai Nyemba.

Abanye bayakusola ukukhethwa kukaMadhuku loManyeruke.

UMnangagwa uthi uzafungisa ikomishini le ukuze iqalise umsebenzi ekuphendukeni kwakhe kweleChina ngeviki ezayo.

Uthi umlandu wayo ngowokudingisisa ukuthi ngobani abaqala udlakela olugoqela ukutshiswa kwezimota lokugqekezwa kwezitolo.

UMongameli Mnangagwa uthi izahluza njalo udaba lokungenela kwamasotsha lamapholisa ekulwisaneni labasekeli bomanyano weMDC Alliance abanakanelwa ukuthi yibo abaqala loludakela.

Kodwa ingcwethi ecubugungula ezombusazwe uMnu Dinizulu Macaphulana uthi umlandu walikomishini omqoka ubumele ube ngowokucwayisisa ukubulawa kwabantu ngamasotsha lokuthi athunywa ngubani.

Kunjalo nje, uMongameli Mnangagwa ukhangelelwe ukufungisa abasekeli bakhe kusasa ukuze baqalise umsebenzi.

please wait

No media source currently available

0:00 0:02:14 0:00

Facebook Forum

XS
SM
MD
LG