Ibandla lePeople’s Democratic Party, elikumanyano we MDC Alliance lithi lihlolisisa udaba lokuziphatha kuka khansila Arnold Batirai, owakhethwa ukuthi amele uward 24 ko Bulawayo kukhetho olwedluleyo, ngemva kokuthi afunge ngolimi lwesiShona abanye besenzenjalo ngesingisi.
Lokhu kwenzakale ngoLwesihlanu kugcotshwa amakhansila amatsha koBulawayo, lapho inengi ebelize kulumkhosi lithukuthele ngokwenziwe ngukhansila Batirai, lacitshe lamtshaya. Ukhansila lo ubikwa ubephuzile kulumbuthano njalo ebukeka edakiwe lapho efungiswa phambi kukamabhalane omkhulu weBulawayo City Council, uMnu. Christopher Dube.
Utshele abantu ukuthi ulelungelo lokuthi afunge ngolimi lukanina. Isikhulumeli sebandla le PDP elikhokhelwa nguMnu. Tendai Biti koBulawayo, uMnu. Edwin Ndlovu uthi bekufanele ukhansila Batirai enze lokho okufunwa ngabantu njengoba kuyibo abamkhethayo.