Abebandla eliphikisayo le Zimbabwe Communist Party bathi akukho okungafezwa ngabaphathintambo abakhethwe nguMongameli Mnangagwa ngoLwesihlanu ukuvuselela umnotho welizwe nxa uhulumende we Zanu PF engaguqukanga kundlela asebenza ngayo.
Lokhu kuvezwe yinkokheli yalelibandla embuthanweni lentathelizindaba ngemva komhlangano we dale elimqoka lebandla ele ZCP National Steering Committee eHarare ngoLwesihlanu.
Unobhala jikelele walelibandla, uMnu. Ngqabutho Mabhena ulandisa ukuba kungani yena labanye bakhe bengakholwa ukuba kukhona okungenziwa ngabaphathintambo abasanda kukhethwa ukukhokhela ingatsha zikahulumende.
UMabhena ulandisa njalo ngendlela athi yizo ezingasebenza ukuvuselela umnotho welizwe abebandla lakhe lesikhomanisi elikholwa kizo.
Uthi yikho abebandla lakhe bezoqhuba imikhankaso ebalisa owe “ Red October Campaign ” eyaqalwa kwele Russia ukusebenza lezakhamuzi lezisebenzi endaweni lapho abahlala ukuze bazwisise umlandu wabo ukuthi njengezizalwane ze Zimbabwe,kuyini okumele kwenzakale.
UMabhena uthi phansi kwalumkhankasa we Red October bazachasisela uzulu ngendikimba yobukhamanisi lokubafundisa phezu kokuqakatheka kokuzwisiza okwenziwa nguhulumende lapho esithi udinga usizo kwamanye amazwe athuthukileyo ukuthi kutshoni lokho kibo.
