amalinks wokungena

Breaking News

Sebefika Kwabane Abanakanelwa Ukuba Bengabe Bebambele iCholera koBulawayo


Bulawayo City

NgoLwesihlanu koBulawayo kubikwe kulabantu abane abangabe bebanjwe yimikhuhlane yesihudo seCholera basiwa esibhedlela se Thorngroove lapho abahlolisiswa ukuthi ngeqiniso yiyo ebahlaseleyo. Abanengi balababantu ngabantu abake bahamba endaweni ezimemetheke iCholera kanye leTyphoid.

EMavikini adlulileyo amadolobho eHarare leGweru ahlaselwe yimikhuhlane yesihudo seCholera leTyphoid ngenxa yamanzi angahlanzekanga ahlangane lengcekeza evela ezambuzini engalahlwa kahle icine ihlangana leyezimpompi yamanzi aphansi. Inani labantu eselibhubhile ngalimkhuhlane liya liqansa esigodlweni njalo ababikwa begula labo baya besanda.

Kulabantu abathathu abacatshangelwa ukuthi bengabe beleCholera loyedwa ongabe eleTyphoid abahanjiswe esibhedlela seThorngroove koBulawayo ngoLwesihlanu ntambama.

UBulawayo City Council ubesanda kwazisa ukuthi iBulawayo yona ayikabi sengozini yeCholera kodwa akubanga nsuku zatshwala esazisa njalo ukuthi iCholera isihlasele lelodolobho.

Umnumzana Morris Nkala utshengisele ukudana kakhulu ngoba koBulawayo kungcono kulakwezinye izindawo.

“Kulusizi kakhulu ukuthi umkhuhlane weCholera usubambe abantu koBulawayo kodwa akulanto ebesingayenza ngoba abantu bayahamba kakhulu ngenxa yesimo yesizwe Kodwa ke khathesi ngoba sokuphakathi kwethu kuyamele abantu bebelolwazi lwalomkhuhlane ukuzebenelise ukuzivikela njalo bengamemethekisi umkhuhlane”.

KoBulawayo kuqale uhlelo lokuphungula isilinganiso samanzi atholiswa abantu okuyinto engacina imemethekisa igcikwane leCholera. Elandisa ngaloludaba uNkosikazi Nothabo Nyathi uthi uBulawayo laye sesengozini ngenxa yokuhamba kwamanzi.

“Thina lapha koBulawayo lathi sesingenile kulingozi eyeCholera siyesaba kakhulu sisesabela abantwana esibaphekezela nsukuzonke ezikolo. Asazi ukuthi singabavikela njani ukuthi bengacini beyithatha khonangale esikolo. Besicela usizo ukuthi sincediseke lokuthi amanzi ame ukuhamba ukwenzela ukuthi abantu bahlale behlanzekile izikhathi zonke”.

Abaphila ngokuthengisa izilimo endaweni ezinengi baqanjwa njengabanye ababangela ukumemetheka kweCholera kwamanye amadolobha kodwa bona bayala lokhu kugconwa. UMnu. Thamsanqa Khumalo uthi bona balwisana leCholera ngendlela ezimbalwa ezigoqela ukugezisa abakuthengisayo ngamanzi.

“Thina njengamaVendor siyezwa ukuthi abanye bayakhitshwa ngenxa yokuthi yibo ababangela iCholera kodwa thina asicabangi ukuthi asila any contribution to that, mina indlela engizigcinela ngayo izinto engizithengisayo, okubolileyo angikugcini ngikulahlela lapho okumele kulahlelwe khona njalo kulamanzi okugezisa izithelo zethu, sithengisela emaPlastikini”

Umongikazi uSister Rebecca Madlela uthi kuqakathekile ukuthi abantu behlanzeke ikakhulu emakhaya abo.

“Ingcekeza yiyo ebangela ukuthi impukane zithathe umkhuhlane ziwuletha endlini, kakugezwe izandla, wonke umuntu ongena esambuzini kageze izandla ngesepa. Abantu abahlale beqaphela ukuthi amanzi abawanathayo abawaBoil ukuze babone ukuthi noma kungaze kube njani abasoze bawubambe umkhuhlane weCholera”.

USister Madlela welekile ngokusebenza kweWaterguard lokuhlanzeka kanye lokuthi iCholera ingena njani emzimbeni womuntu.

Abantu kabathenge iWaterguard, lentengo yakhona iyehlisiwe njalo isivalo esisodwa uyasifaka kutwenty litres njalo uyawasebenzisa okwamalanga amathathu. AmaVegetables awageziswe njalo ukudla kudliwe kutshisa okuseleyo kuvalwe kubekwe kuhle

Edolobheni laseHarare kubikwa kutholakale elinye igcikwane elingaselaphekiyo ngemithi ekhona okuyinto engatsho okunengi ekwelapheni lumkhuhlane

Uzulu ukhuthazwa ukuqina ngokulondoloza ukuhlanzeka ikakhulu abone ukuthi izandla ziyagezwa sikhathi sonke nxa engangena esambuzini lokudla okunjenge zithelo lemibhida kugezisiwe kuhle.

please wait

No media source currently available

0:00 0:03:43 0:00

Facebook Forum

XS
SM
MD
LG