amalinks wokungena

Breaking News

Iyaqhubeka Imidlalo yePremier Soccer League Ngempelaviki


Imidlalo yeCastle Lager Premier Soccer League iyaqhubeka ngoMgqibelo amaqembu alwisa ukuphakamisa isicoco seLeague abalisa eleFC Platinum leleNgezi Platinum Stars ebhekane lemidlalo engaguqula isimo sengalane yemiklomelo.

Iqembu leNgezi Platinum Stars, lona elihlezi endaweni yesibili engalaneni lizavakatshela iqembu elisemsileni eleBulawayo City ngoMgqibelo enkundleni yeBarbourfields kuthi eleFC Platinum lizemukela eleDynamos enkundleni yeMandava.

Iqembu leNgezi lizabe likhangelele ukuthatha imiklomelo yomithathu kuqembu leCity lona eliqhuba nzima lonyaka libe selithandazela ukuba eleDynamos, lona elilakho ukugunyulwa kuLeague, liphazamise eleFC Platinum.

Iqembu leFC Platinum lihlezi phezu kwengalane lilemiklomelo engamatshumi ayisithupha lambili kuthi eleNgezi lilemiklomelo engamatshumi ayisithupha.

Kweminye imidlalo yangoMgqibelo iqembu leBlack Rhinos lizadibana leleTriangle kuthi eleHarare City lizadlala leleChicken Inn.

NgeSonto iqembu leHighlanders lizavakatshela eleCAPS United enkundleni yeNational Sports Stadium.

Kweminye imidlalo yangeSonto iqembu leChapungu lizadlala leleShabanie Mine eAscot stadium, iqembu leHerentals lizangqikilana leleMutare City eRufaro Stadium kuthi eleBulawayo Chiefs lizadibana leleNichrut eLuveve Stadium.

NgoMvulo iqembu leYadah lizakwamukela eleZPC Kariba enkundleni yeRufaro.

please wait

No media source currently available

0:00 0:01:44 0:00
XS
SM
MD
LG