amalinks wokungena

Breaking News

Ifilimu yeGukurahundi Itshiye Abanengi Behlengezela Inyembezi


Ifilimu emayilana ngombhuqazwe weGukurahundi ethulwe koBulawayo ngempelaviki itshiye uzulu ehlengezela inyembezi njalo esithi loludaba kumele lulungisiswe ukuze kwelatshwe amanxeba alokhu ebhibhidla.

Ababone lifilimu bagoqela uzulu jikelele, abamabandla ezombusazwe atshiyeneyo, abameli benhlanganiso ezizimeleyo kanye labekomishini ebona ngokuxolelana, iNational Peace and Reconcililiation Commission.

Ifilimu le iqoqwe yintathelizindaba yakoBulawayo elodumo uMnu Zenzele Ndebele phansi kwesihloko esithi Gukurahundi Genocide 36 years later.

Ifilimu le ivuse imizwa etshiyeneyo ebantwini abayibukeleyo egoqela usizi kanye lolaka lapho besizwa abantu bekhuluma ngokwabehlelayo.

Inengi belikhala ngokuthi lalithwaliswe nzima ngamasotsha kaMnu Robert Mugabe aweFifth Brigade kanye lama-dissidents.

Omunye owesifazana okulifilimu ongathandanga ukubethwa ngegama uveze ukuthi wachithekelwa ngumendo umyeni wakhe wamtshiya ngoba wayehlala ebanjwa iganyavu ngama-dissidents eNyangalinde.

Omunye njalo obethwe kuphela ngesibongo, uJiyane, uveze ukuthi ungomunye wabantu ababegcinwe enkambeni yeBhalagwe ngamasotsha kaMugabe lapho okwabulawa khona amakhulu abantu bajikelwa emgodini.

UJiyane uthe amadoda ayegcinwe kulinkamba ayetshiswa amaphambili ngamaCIO angabafazi ebethesa icalala lokugcina ama-dissidents abanye bahle befe.

Omunye njalo owesilisa uNdlovu uveze ukuthi yena waqunywa indebe yomlom,o eyangaphansi kanye lendlebe yiFifth Brigade watshaywa waqaleka amasotsha asebamba umkakhe lodadewabo iganyamvu.

Lezi ngezinye zezehlakalo ezikufilimu leli ezitshiye uzulu edanile kanti abanye bethukuthele besithi udaba lweGukurahundi kumele lulungiswe.

Induna uFelix Nhlanhlayamangwe Khayisa Ndiweni uncome ifilimu leyi wakhuthaza njalo amalunga eNational Peace and Reconciliation Commission ukuthi alubambe kuhle udaba lolu ngoba abantu abanengi belokhu befuthelene.

“Umsebenzi lo uqalisile, abantu baba buhlungu balamanxeba. Kuqakathekile ukuthi abantu abalamanxeba balalelwe. Kumele isukume kulabo abalamanxeba hatshi kulabo abaphethe umkhonto,” kutsho uNdiweni.

Amalunga eNational Peace and Reconciliation Commission abekhona ebeyisithupha njalo agoqela umgcinisihlalo wayo uMnu Masole Nare.

Omunye wamalunga alikomishini uhozwe nguzulu esithi kamelanga abekhona ngoba ungowesiShoneni.

Omunye wababone lifiimu nguMnu Khumbulani Mlauzi yena osole ikomishini yezokuxolelana esithi akulalutho oluzwayo engalwenza ngodaba lweGukurahundi.

“Ilizwi leli aliyefika kaMnangagwa; sicela abantu abanjengo Commissioner Chigwedere basuwe kukomishini ngoba yibo abenza iGukurahundi. Akubunjwe ikomishini enjengaleyi ekhangela okwabuntu abadutshulwa libutho ngemva kokhetho,” kutsho uChigwedere.

Ngaphambilini kokubukiswa kwayo, amapholisa ake azama ukuyivimba lifilimu kodwa yethulwa ngemva kokungenela kweNational Peace and Reconciliation Commission.

Ngalokho, uMnu Mbuso Fuzwayo owenhlanganiso yeIbhetshu likazulu uthi bayathokoza.

“Kuyinto enhle ukuthi namhlanje kube le-launch leyi, kakhulu sibonga ikomishini yeNPRC eyiyo ethe lapho uhulumende esefuna ukuvimba yabuza ukuthi kuvinjelwani,” kutsho uMnu Fuzwayo.

please wait

No media source currently available

0:00 0:05:19 0:00

Umqondisi weZimbabwe Christian Alliance uMnu Rev Useni Sibanda yena ukhuthaze ikomoshini le ukuthi isebenze lenhlanganiso esezilesikhathi zisebenza ezigabeni nxa ifuna udaba lolu lulungisiswe.

“Ngibona iNPRC kumele iphiwe ithuba, kodwa bebodwa kabasoze benelise ukusebenza lindaba, kumele besebenze labantu abakhona ezigabeni ukuze kube lula kibo,” kuchasise uMnu Sibanda.

Abanye uNdebele akhulume labo kulifilimu bagoqela umkhokheli webandla leZapu uMnu Dumiso Dabengwa, umqondisi weMafela Trust uMnu Zephania Nkomo lowayengumqoqi wenhlelo zeZipra uMnu Misheck Velaphi.

Inkosi yamaNdebele uMnu Bulelani Khumalo laye ubekhona ekwethulweni kwalifilimu njalo ubikwa engcotshiwe ngudlu ukuba yinkosi.

UNdebele, yena oke wethula enye njalo ifilimu emayelana ngeGukurahundi eminyakeni edluleyo elesihloko esithi Gukurahundi: A moment of Madness, utshele iStudio 7 ukuthi injongo yakhe yikuphehla ukukhulumisana ukuze udaba lolu lulungisiswe.

please wait

No media source currently available

0:00 0:02:07 0:00

Abantu abafela kulumbuqazwe becobodiswa ngamabutho kaMugabe eMidlands leMatabeleland babikwa besedlula inkulungwane ezingamatshumi amabili.

Facebook Forum

XS
SM
MD
LG