amalinks wokungena

Breaking News

Izitolo Ziyavalwa Ekuqhubekeni Kokonakala Komnotho Welizwe


Isinkwa sithengiswa emkambo wensitha
Isinkwa sithengiswa emkambo wensitha

Izitolo ezimbalwa zakoBulawayo zivalile kuthi ezivulieyo zithengisa impahla ngentengo ezine kuthi abanye abafaki intengo umuntu eyitshelwa lapho esebhadala. Intengo le, ibalisa eyeBond Note, iRand lakwele South Africa idola leMelika kanye leyabathenga ngemali yebulenjini eyokuswiper.

Izitholo ezivulileyo sezikhuphule intengo yempahla, ezinye sezibhalwe ukuba zithengiwe zingathengwanga.

Ezinye impahla sezilentengo ezidlula ezintathu osekutshiye abathengi labanini bamavinkili beqaphele ukukhweza intengo kusiya ngokuthengiswa kwemali emkhambo wensitha.

Osomabhizimusi bakhala ezimathonsi bathi sekunzima ukuthenga bethengisa.

Usomabhizimusi wakoBulawayo uMnu. Lovemore Moyo uthi kulezi insuku kulukhuni ukuba kubhizimusi.

“Ukuqansa kwentengo sekusiphazamise kakhulu asizakwazi ukuthi sihlele kanjani intengo zempahla yethu ukusa kwamalanga sivunga intengo ivuka iqansile lokuthi sithenise njani asisakwanzi kunzima,” kutsho uMoyo.

Omunye njalo usomabhizimusi, uNkosikazi Sinothile Mbano laye uveze ukukhathazeka ngokuqonga kwentengo ethi labantu abasathengi

Kutsho uMbano: “Ukuqansa kwentengo sekuphambanise amabhizimusi ethu asisakwazi ukuthi sithenge sithengise njani njalo labantu abasathengi ngendlela, labo abathengayo sekunzima ukuba sibathengisele njani .”

Isakhamuzi sakoBulawayo uMnu. Tobias Dlomo uthi inengi labathengisayo sebefuna iRand kumbe idola leMelika engekhoyo emabhanga.

“Sesihlukuluzekile thina abathengi sekulentengo yebond, irand iUS Dollar leswipe. Sicina singazi ukuthi sithenge njani nanko abathengisayo sebefuna imali engekhoyo emabhanga njalo esingayiholiyo lokhu kuyasihlukuluza ngempela,” kutsho uDlomo.

Umumo womnotho e Zimbabwe usukhathaza abanengi, intengo yempahla iqansa mahlayana osekutshiye abathengi labathengisayo besebunzimeni bokuphila. Amavinkili amanengi asevalile kuthi avulileyo alentengo yempahla ekhuphuka njalo nje.

Umkambo wemali wensitha yiwo osulandelwa ekuthengeni lekuthengiseni imphahla ezweni osekutshiye abamavinkili belentengo ezidlula ezintathu empahla yinye.

XS
SM
MD
LG