EleZimbabwe limanyane lamanye amazwe omhlaba ekunanzeni ilanga labesifazana abahlala emaphandleni, eleInternational Day of Rural Women ngoMvulo, abesifazana laba bekhala ngokoma kwempilo.
Ilanga leli lasungulwa ngumanyano weUnited Nations ngenjongo yokuqakathekisa omama bemaphandleni kanye lokunanza imisebenzi abayenzayo.
Embikweni awethule ukhangelane lalolusuku, unobhala jikelele walumanyano uMnu Antonio Guterres ukhuthaze amazwe omhlaba ukuthi ahlomise abesifazana ngolwazi langenhlelo zokuzithuthukisa.
Ilanga leInternational Day of Rural Women liza ngesikhathi uzulu weZimbabwe esidla imbuya ngoluthi ngenxa yokudula kwezinto ezimqoka empilweni yakhe kanye lokutshabalala komnotho.
Isakhamuzi seGaranyemba eGwanda, uNkosikazi Charity Dube utshele iStudio 7 ukuthi ubunzima abahlangana labo emaphandleni buphindwe kabili.
“Njengathi ngapha emaphandleni uyehluleka ngitsho oluthenga amafuka okupheka nge$15,” kutsho uNkosikazi Dube.
UMaDube ulabantwana abathathu abaphilisa ngokulima imbida lamatamatisi.
Kodwa uthi usivande sakhe sincane njalo uthi ukutshabalala komnotho lokusilela kwemali okuqhubekayo elizweni sokusenza kubenzima ukuthi aphilise imuli yakhe.
“Ngenyanga ngingathengisa imbida yami ngiyakwanisa ukuthola i$80 kodwa kulezinsuku sokunzima. Ayisagcineki imali; ungezwa kuthiwa kubonakale icooking oil, ususiyalayina lawe,” uqhubeke echasisa uMaDube.
Ukhuthaze uhulumende kaMongameli Emmerso Mnangagwa ukuthi aqakathenkise omama bemaphandleni ngokubancedisa ngemali yokusungula inhlelo zokuziphilisa.
Amazwi kaMaDube agcizelelwe yisakhamuzi seSilobela uNkosikazi Rairo Moyo yena othe kumele abesifazana emaphandleni bancediswe nguhulumende ngoba beyinsika yesizwe.
“Isicelo sami ngesokuthi ubaba (uMnangagwa) ake asincedise ngemali yenhlelo zentuthuko ezigoqela ukufuya inkukhu ukuze sithole ukuncedakala,” kutsho uMaMoyo.
Ezinye indubo ezibhekane labesifazana bemaphandleni zigoqela ukuqanqabula imango emide besiyakukha amanzi lokuswela indlela zokuziphilisa.
Lanxa kunjalo, sithi Happy International Day of Rural Women.