Iqembu leHarare City lizangqikilana leleTriangle United kufinal yenkezo yeChibuku Super Cup enkundleni yeGibbo ngoMgqibelo.
Lanxa ekhangelele ukunqoba, umqeqetshi weHarare City uMark Harrison uthi umdlalo lo uzakuba nzima kubo ngoba bengadlaleli ekhaya.
“Sidlalela enkundleni yeGibbo okuyinto eyenza singene kulumdlalo iqembu leTriangle selivele lizibambe esidukwini ngoba kulikhaya labo,” kutsho uHarrison.
“Zinengi inkundla ebesingadlalela kuzo ezibalisa eyeMandava kumbe eyeBarbourfields; ngakho ngokubona kwami sivele sifana labantu ababhekane lomqanso kodwa sizabona lapho okuyawela khona induku loxakuxaku.”
UHarrison wengeze wathi iqembu lakhe kalilandawo yokuhlala eTriangle, okutsho ukuba kuzamele belale edolobheni leMasvingo besebesiya eTriangle sebelanda umdlalo.
Iqembu leHarare City, okuyilo eliphakamise inkezo yeChibuku Super Cup nyakenye, lifinyelele ku-final ngemva kokunqoba eleCAPS United nge 2 ka 1.
Lonyaka ngokwesine ukuba iqembu leHarare City lifinyelele ku final yeChibuku njalo yilo eliyiphakamise langomnyaka ka2015.
Iqembu leTriangle lona lifinyelele ku-final ngemva kokunqoba eleDynamos nge 2 ka 1 kusigaba.
Iqembu elizanqoba ku-final yalonyaka lizathola umvuzo wenkulungwane ezingamatshumi ayisikhombisa lanhlanu kanye lelungelo lokumela ilizwe kumncintiswano weCAF Confederation Cup.
Kumidlalo yalonyaka eyeCastle Lager Premier Soccer League, iqembu leHarare City linqobe eleTriangle nge 1 ka 0 emdlalweni wakuqala odlalelwe eHarare kwathi owesibili odlalelwe enkundleni yeGibbo uphele zingutshiki lobhanqa 1 ka 1.
Iqembu elizanqotshwa lona lizathola inkulungwane ezingamatshumi amahlanu.
Ngaphandle kweqembu leHarare City, amanye amaqembu aseke aphakamisa inkezo yeChibuku selokhu lumncintiswano wavuselelwayo ngomnyaka ka 2014 ngabalisa eleFC Platinum ngo 2014 kanye leleNgezi Platinum ngo2016.
Akula midlalo yePSL ezadlalwa ngalimpelaviki.