Uzulu weZimbabwe usezisola ngokutshengisela akwenzayo kususwa owayengumongameli welizwe uRobert Mugabe ngenyanga ka Lwezi nyakenye esithi lokhu akuqedanga dubo elizweni kodwa kwatshiya ilizwe selibuswa ngabalokhu beqhubeka phambili busephula amalungelo abantu.
Sokwedlule umnyaka uMongameli Emmerson Mnangagwa enikezwe intambo zombuso ngabebutho kodwa inengi labantu lithi isimo somnotho welizwe Kanye lezombusazwe lokhe kumadolonzima nxa kukhangelwe ukuthi uMugabe watshiya sinjani.
Umnumzana Kudzanai Dombo se Harare uthi ukukhetha uMnangagwa ngemva kokuba ehlezi isikhathi eside eyisiphathamandla kumbuso kaMugabe akuqedanga indubo elizweni.
“Kumnyaka odluleyo sitshengisela sikhupha uRobert Mugabe asizange sibekwazi ukuthi ukufaka umnangagwa akusoze kuntshintshe lutho ngenxa yokuthi umbuso we Zanu pf ngombuso oyekela umnotho welizwe usiwa, ngumbuso owephula amalungela abantu njengalokhu esikubona sekuloMnangagwa, esingakutsho yikuthi ukuze ilizwe liqhubekele phambili lithuthuke kufanele kuntshintshwe uhulumende wonke olokwenza le ZANU PF kube lomunye uhulumende omutsha ozaletha ingqondo lamacebo amatsha azahambisa ilizwe phambili,” kutsho uDombo.
Esinye njalo isakhamuzi se Harare uMnu. Tjenesani Ntungakwa uthi umehluko okhona ngemva kwezehlakalo zanyakenye yikuthi abebutho sebelamandla edlulisa amalawulo.
“Ngokubona kwami mina , kunengi esasingakwazi ukuthi kungenzakala kunzima ukuthi ngithi kukhona okungcono kumbe okubi okwalethwa nguMnangagwa kodwa okukhona yikuthi amasotsha aselamandla eZimbabwe. Iqiniso yikuthi umbuso ususekelwe ngamandla awesisotsho ukwedlula ngesikhathi lesiyana okwakukhona, sibona ukukhutshwa kwabantu emigwaqweni lapho abakade bethengisa besenza izinto ezinjalo lakho kukhona okunye okungakhanyiyo umnangagwa angakuvezi egcekeni kodwa ukubona kwami amadoda la akhona ukuthi ehlale ebuse ilizwe beyenze okwabo ngoba ukukhupha abakwenza uMugabe labo sekubanike ithuba,” kutsho uNtungakwa.
Omunye wabatsha walabo abatshengisela ngokuwa kombuso kaMugabe, uLeopold Munhende uthi akusoze kube lomunye umbuso ozadlula ukuhlukuluzwa kwabantu njengo kaMugabe.
“Mina ngangisedolobheni eharare sibili satshengisela sisuka kumngwaqo ka Samora lo Simon Muzenda sabhoda safika eStatehouse sadlula eMunhumutapa, sadlula saya ngemva kwe HICC. Angizisoli ngalokhu.uMugabe kwasekuyisikhathi sokuthi ehambe angimkhanuki njalo lokhu esikubonayo ukuthi ilizwe selilibi ngiyakwazi ukuthu ngumnangagwa kodwa angitsho ukuthi umgabe aphenduke umgabe wayemongameli omubi kakhulu emhlabeni kazihambele kungcono,” kutsho uMunhende.
Kodwa abanye abafana lomnumzana Richard Mahomva oyingcwethi kwezenotho uthe izifiso zabantu beZimbabwe ezabenza batshengisele azisafezwanga nguhulumende kaMnangagwa.
“Okuqakathekileyo okwakudingwa yizizalwane zeZimbabwe yinguquko yezokuphila kwabantu ukuthi umumo womnotho ulungiswe ngoba siyakhumbula ukuthi Ulwezi eqalisa eyinye ingqake eyayivele ikhona yayindaba yokutholakala kwemali emabhanga okulokho kuqubeka isiba luhlupho olukhangelane labanengi baseZimbabwe. Lokhu kungangokuthi nxa sesikhangele umnotho sibonanga angani thina izifiso zikazulu ukuthi abantu bekhuphe uMugabe azikagcwaliswa,” kutsho uMahomva.
Inengi lengcwethi ezicububgula ezombusazwe Kanye labantu makhaza bakhala ngokuthi ukungena embusweni kukaMnangagwa nyakenye kakuzange kuguqule lutho ngoba inhlupho ezibhekane labantu kukhanya seziphindwe kabili loba kathathu.
