amalinks wokungena

Breaking News

Abantu Abangamatshumi Amane Batshela Ebhasini Kulandela Ukudubuka Kwethanka Legas


Kufe abantu abafika amatshumi amane lambili emgwaqweni osuka koBulawayo usiya eBeitbridge ngemva kokuba ibhasi ebilubhekise eMusina ivela edolobheni leZvishavane ilumathe umlilo eWest Nicholson.

Kucatshengelwa ukuthi ibhasi leli belithwele itanka lomoya we gas yokupheka olumathe kwaqhamuka umlilo.

Inengi lalabo abakade begade libhasi ngabathenga impahla kwele South Africa eMusina bezothengisa kuleli njalo libhasi leli elithiwa Brooklyn belibathwala besuka edolobheni leli iphinde iphenduke labo ngemva kokuba sebethenge impahla zabo.

NgoLwesine libhasi isuke eZvishavane ilubhekise eMusina yadlula eFilabusi leGwanda. Kuthe phakathi kwamabili yikho elumathe umlilo phambidlana kweWest Nicholson okungaba ngamakhilomitha angamatshumi ayisithupha lapho usuka edolobheni leGwanda.

Abantu abangamatshumi amabili lasikhombisa basinde kulingozi bathwalelwe esibhedlela esikhulu seGwanda kwathi abathathu abatshe kakubi badluliselwa esibhedlela seUnited Bulawayo Hospitals e UBH.

Amapholisa akhiphe izidumbu zabantu abangamatshumi amathathu lambili ebhasini kodwa kucatshangelwa ukuthi abanye batshe baba ngumlotha. Inengi lalabo abatshele ebhasini lisele lingamathambo kuphela.

Imbangela yomlilo isacwayisiswa kodwa kucatshangelwa ukuba kungabe kudubuke itanka legas yokupheka ebeliphakathi kwebhasi.

UMtshayeli walibhasi uMnu Ndabezinhle Lenny Sikhosana ngomunye walabo abasinde kulingozi njalo uthi baqale bezwa umnuko ingathi ngowamafutha ephethulo andubana kulumathe umlilo.

“Sasesi puller off the road ukuthi sime sibone ukuthi kuyini , the time ngiapply amabrakes umlilo wahle wavungama ngemva kwami, wahle wabamba ibus yonke phambili kimi kuscreen bengingasaboni lapho esiyakhona, umlilo wahle wagcwala ibus yonke kungasela even ivhance ukuthi singaphuma sithini,” kutsho uSikhosana.

UNkosazana Simangaliso Ndlovu ngomunye walabo abagadele libhasi eZvishavane njalo uthi usile ngokuphuma ngefasiteli kulibhasi.

“Mina bengihlezi phakathi laphakathi ngiphume ngewindow, abanengi behlulekile ukuphuma ngoba abaphumileyo babe balutshwane kakhulu.Kulomama ebengihamba laye angimboni kuze kube kathesi so ngicabangela ukuthi utshele phakathi,” kutsho uNdlovu.

UNkosazana Siboniso Nyathi yena ogadele libhasi eGwanda lomkakhe uthi bobabili basinde kulingozi ngoba bebehlezi phansi komnyango.

UMaNyathi uthi inengi labantu litshele ebhasini.

“Besesibanga iMakhado yaqala ukubhebha, ekubhebheni kwayo mina kade ngihlezi kuseat yakuqala ngasengitshaya isivalo ekutshayeni kwami isivalo ngasengifuqwa ngabanye ngaqamuka isandla but abanengi batshele ebhasini,” kutsho uMaNyathi.

UMfundisi weMethodist Church eZvishavane uRev. Lindsay Nleya ubehamba lomunye ubaba olahlekelwe ngumkakhe lomntwana kulingozi njalo uthi lingozi izwisa usizi.

“Silusize kakhulu yinto ebuhlungu leyi ukuthi kulahleke abantu abanengi kangaka ayisiyonto elula, ngilamalunga amabili abemuli inye umama lomntwana, ubaba wakhona ngilaye lapha kakwanisi lutho okutshengisa ukuthi yinto ebuhlungu kakhulu ukuthi silahlekelwe ngendlela enje so,” kutsho uNleya.

Omunye olahlekelwe ngumkakhe nguMnu Lazarus Phiri oweNkakezi eFilabusi njalo usole kakhulu abacitsha umlilo ngokuphuza ukufika.

“Inhlelo okumele zisincedise masinyane zehlulekile ukufika ngesikhathi , njengemota yefire brigade ifike kathesi ekuseni ngemva kwe five hours khona ifika isithi izocitsha umlilo akuncedi ukubana kade befunani.Imbangela yokuthi uNkosikazi akwanise ukuthi aphume ayekwelinye ilizwe yikuyadinga izinto ezingekho elizweni lakithi,” kutsho uPhiri.

UMphathintambo obona ngezenzakala kweleZansi yemaNdebeleni uMnu Abedinico Ncube uveze ukudabuka ngalingozi njalo uthi uhulumende uzancedisa izimuli ezilahlekelwe yizihlobo kulingozi.

Kutsho uNcube: “As government vele siyaphathisana lezimuli yinto ezalungiswa but l cannot just determine ukuba kuyini okuzakwenziwa but I know definitely government will chip in.”

Izihlobo zomnikazi webhasi le ezifike esibhedlela zizobona abalimeleyo kazithandanga ukuxoxa lentathelizindaba zisithi zisakhipha umbiko ngemva kokucwayisisa imbangela yalingozi.

Isikhulumeli samapholisa eZansi yemaNdebeleni uChief Inspector Philisani Ndebele uyazise izihlobo ebezibuthene ukuthi amathambo lezidumbu zizakuyahlolwa ngemitshina yeForensics ukuze kwazakale ukuthi ngezabobani.

UZulu ocabangela ukuthi angaba elezihlobo ebezikulibhasi ukhuthazwa ukuya esibhedlela esikhulu seGwanda.

Lanxa amapholisa esithi abantu abafele engozini le bangamatshumi amane lambili, inkampani yeBrooklyn Express ithi bangamatshumi amathathu lanye. Umqondisi wenkampani le uMnu Nqobile Ndlovu wethule umbiko namuhla ntambama esithi ulusisi kakhulu ngalingozi njalo uthumele amazwi enduduzo kumuli zabafi labalimeleyo.

UMongameli Emmerson Mnangagwa laye wethule amazwi enduduzo kumuli ezilahlekelweyo labalimeleyo.

Facebook Forum

XS
SM
MD
LG