amalinks wokungena

Breaking News

UMadinda Ndlovu Uthi Iqembu leHighlanders Lizaphindisela kwele Bulawayo Chiefs


Iqembu leHighlanders.

Umqeqetshi weqembu le Highlanders uMadinda Ndlovu uthi bazimisele ukuphindisela ukunqotshwa abakwenziwe liqembu le Bulawayo Chiefs kuhlandla lakuqala elemidlalo yesigaba se Premier Soccer League.

UNdlovu utshele intathelizindaba zemidlalo ukuba uyazi ukuba iqembu lakhe lingagxoba ikhasi le banana nxa lingayekethisa ukubopha ziqine emdlalweni walo lele Bulawayo Chiefs ozaqhutshelwa enkundleni ye Barbourfields ngeSonto emini.

Iqembu le Chiefs litshaye ele Highlanders nge 1 ka nya emdlalweni wehlandla lakuqala elemidlalo yalonyaka njalo lenelise ukunqoba inengi lamaqembu amakhulu adlala kusigaba se Castle Lager Premier Soccer League kodwa uMadinda uthi okungamelenga bakuvumele yikuba libatshaye lize libaphinde umphehlo.

Kutsho uNdlovu: “Babulala bethule phela labana. Kodwa lathi sifuna sifuna ukuthi silwise ukuba singavumeli ukuba basidle baze basiphinde. Bavele bayasikoloda yikho ke kuzamele siphindisele lathi.”

Iqembu le Chiefs kumele lithole imiklomelo emibili kumidlalo emibili elisele layo ukuze libe leqiniso elokuthi lizakwala lilokhu lidlala kusigaba se PSL ngomnyaka ozayo njengoba lisasengozini eyokugunyulwa nxa lingehluleka ukunqoba kuthi iqembu le Nichrut elihlezi endaweni yesine nxa usuka emsileni linqobe kweyalo imidlalo emibili elisele layo.

Iqembu le Chiefs lilemiklomelo engamatshumi amathathu lathoba minwe mbili kuthi ele Nichrut lilemiklomelo engamatshumi amathathu lantathu.

Imidlalo yeviki lamatshumi amathathu lantathu iqala kusasa lapho intshantshu zalonyaka iqembu le FC Platinum elizemukela khona iqembu le Ngezi Platinum Stars kusasa enkundleni ye Mandava njalo inhlanganiso ye PSL ikhangelelwe ukuba yikho lapho ezahle iphe khona iqembu le FC Platinum isicoco seligi.

Kweminye imidlalo yangoMgqibelo iqembu le Herentals lizadlala lele Chicken Inn ngase National Sports Stadium, iqembu le Bulawayo City lizadlala lele CAPS United ngase Barbourfields kuthi iqembu le Harare City lizadlala lele ZPC Kariba ngase Rufaro.

NgeSonto iqembu le Dynamos lizemukela ele Mutare City ngase Rufaro, iqembu le Triangle lizadlala lele Nichrut ngase Gibbo, iqembu le Black Rhinos lizadlala lele Shabanie Mine ngase National Sports Stadium kuthi iqembu le Chapungu lizadlala lele Yadah ngase Ascot.

please wait

No media source currently available

0:00 0:01:59 0:00

Facebook Forum

XS
SM
MD
LG