amalinks wokungena

Breaking News

AmaWarriors Azabakwazi Ngomnyaka Ozayo Ukuthi Ayahamba Yini Kumidlalo yeAfrica Nations Cup


Iqembu labesilisa elimela ilizwe emdlalweni wenguqu lizaze libekwazi ngomnyaka ozayo ukuba liyaphumelela na ukuyadlala kumncintiswano wokudinga intshantshu zezwekazi laseAfrica ngemva kokunqotshwa ngeleLiberia ngeSonto.

Iqembu leli lizigwaze ngowalo ngemva kokudlalisa amathuba okuhlohla umdlalo waphela linqotshwe nge1 ka 0.

Limpumela itsho ukuba wonke amaqembu amane akusibaya sikaGroup G alalo ithuba lokuyadlala kumncintiswano weAfrica Nations Cup ozaqhutshelwa eCameroon ngomnyaka ozayo.

EleZimbabwe yilo elihlezi phezu kwengalane lilemiklomelo eyithobaminwembili ngemva kwemidlalo emihlanu kuthi iLiberia yiyo ehlezi endaweni yesibili ilemiklomelo eyisikhombisa.

Endaweni yesithathu kuleqembu leDemocratic Republic of Congo elilemiklomelo eyisithupha ikanti emsileni wengalane kuleqembu leCongo Brazzaville, lona elilemiklomelo emihlanu.

Intathelizindaba yezemidlalo uNash Mkokwayarira uthi asasemahle kakhulu amathuba eZimbabwe.

“Iqembu lamaWarriors lidlalise ithuba lokuba lihle liphumelele ukuhamba kuAfrica Cup of Nations, kodwa ithuba lisasekhona ngoba angiboni iqembu laseCongo libuya lizonqoba lapha njalo bona bavele bafuna umklomelo owodwa; yikho ke okumele bakwenze yikuba benganqotshwa liqembu leCongo ekubuyeni kwalo lapha,” kutsho uMkokwayarira.

Iqembu leZimbabwe lizakwamukela iqembu leCongo Brazzaville emdlalweni walo wokucina owezibaya ngomnyaka ozayo ngoMbimbitho lidinga umklomelo owodwa kuphela ukuba libe ngelinye lamaqembu azakuyadlala kumncintiswano weAfrica Cup of Nations ozaqhutshelwa eCameroon ngenyanga kaNhlangula.

Kusenjalo amaqembu osekusaziwa ukuba wona vele nomakanjani azabe ekhona ngomnyaka ozayo khonale kweleCameroon ngabalisa eleMorocco, eleMali, Uganda, Nigeria, Egypt, Tunisia, Madagascar, Senegal kanye lele Cameroon okuyilo eliqoqa limidlalo.

Kolunye udaba olumayelana lomdlalo wenguqu, iqembu leFC Platinum letheswe inkatha yokuba zintshantshu zalonyaka kusigaba seCastle Premier Soccer League ngoMgqibelo enkundleni yeMandava ekupheleni komdlalo walo leNgezi Platinum Stars lona eliphutshe lisendaweni yesibili engalaneni yemiklomelo.

Ngaphansi kwengalane iqembu leNichrut yilo eligunyulwe kusigaba saphezulu ngemva kokunqotshwa ngeleTriangle nge4 ka 2 okuyimpumela elitshiye lilemiklomelo engamatshumi amathathu lantathu njalo litshiywa ngemiklomelo emihlanu liqembu eliphezu kwalo engalaneni eleChapungu.

Kusenjalo, inhlanganiso yePremier Soccer Leauge isiyethule umbiko othi iFC Platinum izadibana leqembu leTriangle lona eliphakamise inkezo yeChibuku ekuqaleni kwenyanga ezayo kunkezo yeCastle Challenge Cup.

Lumdlalo uzaqhutshelwa enkundleni yeMandava.

please wait

No media source currently available

0:00 0:02:36 0:00

Facebook Forum

XS
SM
MD
LG