Uzulu weGwanda ukhuthaze uhulumende ngoMvulo ukuthi aphange asungule umbuso wezabelo, owe-devolution, ukuze kube lentuthuko ezigabeni.
Inkuthazo le iphume emhlanganweni oqhutshwe ngumsakazo weStudio 7 ubambene lenhlanganiso yeMedia Center kulelidolobho.
Olwela amalungelo oluntu uMnu Bekezela Maduma Fuzwayo utshele umhlangano lo ukuthi ukukhangelelwa phansi kwabantu besiNdebeleni kwaqala ekubunjweni kwebandla leZanu PF ngomyaka ka1963.
“The main agenda that was there in the formation ye-party eyacina ithatha ilizwe was amaNdebele afuna ukusihambela phambili akusebenzi, so from that time idirection yelizwe yahle yalahleka,” kutsho uFuzwayo.
Omunye okhulume emhlanganweni lo, uNkosikazi Julieth Nkiwane, ongumqondisi wenhlanganiso yeWomen Development Association of Zimbabwe uthe umbuso wezabelo uqakathekile.
Wengeze wathi ukuzibusa kwezabelo akusoze kwehlukanise izizalwane zeZimbabwe njengokutsho kwabanye.
“Abanye abantu nxa beyikhangele i-devolution babona ingathi yinto ezokwehlukanisa isizwe; kodwa yinto ekhona kusisekelo sombuso, lilungelo lethu, nxa sikhangela nxa kungela devolution ilungelo loluntu luyephuka kakhulu,” kutsho uMaNkiwane.
UMayor weGwanda uMnu Jastone Mazhale ukhuthaze uzulu ukuthi atsho ngokwakhe indlela umbuso wezabelo ozaqhutshwe ngayo.
“I-devolution asiyibambeni okuqakathekileyo; kumele sitsho ukuthi sifuna ime njani njalo let us go back to our political organisations, siyexoxisana ukuthi sifuna ime njani,” kutsho uMazhale.
UMnu Malaki Nkomo owebandla leZanu PF utshele umhlangano lo ukuthi ibandla lakhe lizimisele ukulufeza uhlelo lokuhambisa amandla kubohulumende bezabelo.
Lumsakazo uphakathi kokubhoda ngelizwe unikeza uzulu ithuba lokwethula izikhalazo zakhe. NgoLwesithathu uzabe useLupane uphinde uye koBulawayo ngoLwesihlanu.
