Ukukhalala umsebenzi kwabodokotela abasebenza ezibhedlela zikahulumende kuyaqhubeka uzulu esithi uhulumende kumele alungisise loludaba ngokuphangisa abantu bathole ukwelatshwa ngemfanelo.
Okwamanje izibhedlela ezifana leUnited Bulawayo Hospitals, iMpilo, iParirenyatwa leChitungwiza, zelapha abantu abagula kakhulu kuphela.
Odokotela laba bakhgalale umsebenzi besithi uhulumende kumele alungisise udaba lokusilela kwemithi ezibhedlela kanye lokuswelakala kwempahla yokusebenzisa.
Bathi njalo bafuna uhulumende ababhadale nge-dollar leMelika kuphela hatshi nge-bond kumbe amaRTGs.
Unobhala jikelele wenhlanganiso yeZimbabwe Hospital Doctors Association uMnu Mthabisi Anele Bhebhe utshele iStudio 7 izolo ukuthi odokotela bathwele nzima ezibhedlela.
Sixoxe Lomeli weBinga North edale lephalamende uMnu Prince Dubeko Sibanda yena okhuthaze uhulumende ukuthi alungisise izikhalazo zabodokotela ngokuphangisa babuyele emsebenzini.
