Owake waba ngumsekeli wenhloko kahulumende, uMnu Arthur Mutambara uselobe ugwalo lwesibili olulonda imbali yakhe olulesihloko esithi “The Path To Power: In Search Of The Elusive Zimbabwean Dream.”
Ugwalo lolu lwamukelwe nguzulu ngendlela ezehlukeneyo inengi lincoma umsenzi wakhe wokuzama ukulondoloza imbali yakhe kanye leyelizwe leZimbabwe.
Lolugwalo ngolwesibili phakathi kwezintathu uMutambara athi ufuna ukuziloba. Uthi olwesithathu uzalukhipha ngomnyaka ozayo. Olwakuqala ulwethule ngomnyaka odluleyo.
Ugwalo lolu lulandisa kakhulu ngabakhokheli belizwe abagoqela owayenguMongameli uRobert Mugabe, lomuyi uMnu Morgan Tsvangirai.
Luthinta njalo owayengumkhokheli webutho, uMnu Solomon Mujuru yena obhubhele engozini yomlilo eminyakeni embalwa edluleyo.
