amalinks wokungena

Breaking News

'Kubhahile Ukuhlukuluzwa Kwabesifazana Emaphandleni'


Abesifazana bemaphandleni sebekhuthazwe ukuthi bamangale izehlakalo zokudlwengulwa lokuhlukuluzwa kwabo ngabesilisa emapholiseni alubana bethe bahlangana laloludubo.

Esikhathini esinengi, omama kanye lamantombazana emaphandleni bafela ngaphakathi lapho bethe bahlukuluzwa ngabesilisa, ikakhulu ngendaba zocansi.

Lokhu kufakazwe ngabesifazana abahlala esigabeni seSitezi, eGwanda, ngoLwesithathu emkhosini wokunanza umkhankaso wokulwisana lokuhlukuluzwa kwabomama ezindlini emhlabeni jikelele, owe16 Days of Activism Against Gender Based Violence.

Omunye wabesifazana laba, ongathandanga ukubethwa ngegama, usilandisele ngokudlwengulwa athi wakhula lakho.

Ngokusweleka kwenhlala, wasuka wafelwa ngabazali emncane wasezama ukudinga usizo kubomakhelwane. Kodwa endaweni yalolosizo, uthi wathola ukuhlambazwa lokweyiswa okukhulu kuthiwa ulesikhombekhombe.

“Sithe sikhula kade ngihlukuluzwa, ngingenelwa ebusuku ngilele ngatshiywa ngubaba lomama; ngingenelwa ngingela bani ozangimela, ngithi ngiyatshela omakhelwane beyale ukungincedise uzwe bethe ngamadoda akho mina ngingabakhombanga,” kutsho owesifazana lo.

Esinye njalo isakhamuzi seSitezi, uNkosazana Relation Moyo uthi udaba lokudlwengulwa kwabesifazana lolu lubhahile emaphandleni, kodwa esikhathini esinengi luphelela ebadaleni.

Udaba lwe-violence ngingathi lubhahe kakahulu emakhaya uyakwanisa ukuhlukuluzwa ngabazali kumbe njengomntwana oyabe uyintandane lebazalini uyakwanisa ukuthi loba ungumntwana ungumfana uhlala lobabakazi abanye obabakazi bayahlukuluza abantwana abangabafana labomalume labo bayahlukuluza abantwana abangamankazana,” kutsho uMaMoyo.

Amazwi akhe asekelwe nguMnu Chemist Ndiweni, olipholisa kulesisigaba. UNdiweni ukhuthaze abesifazana ukuthi bamangale izehlakalo zokuhlukuluzwa kwabo.

“Umalume uyabamba umntwana ethi embambile kufihlwe kumbe umuntu uyabe ebona ikhadibhokisi kumbe uyabe sevalwe ngemali asikwazi,” kutsho uNdiweni.

“Izigangi siyazibamba eze-rape kuthi umzali afike bacenge umkhwenyana bathi hayi umntwana lo uzakondliwa ngubani uyise esiya ejele,umntwana yena ngokwakhe ohlukuluziweyo ufika ngale eCourt athi hayi ijaha lami ngiyalithanda sibili umagistrate ayehluleke lokuthi athini.”

Ngaphandle kokudlwengulwa lodlakela, zinengi ezinye indlela abesifazana lamantombazaba abahlukumezeka ngazo.

Ukulovisa umntwana oyinkazana esikolo mahlayana ukuze enze imisebenzi yekhaya, yikumhlukuluza; kutsho esinye njalo isakhamuzi uNkosikazi Agnes Mbangeni.

Abesifazana beSitezi laba bathi izehlakalo zokuhlukuluzwa kwabomama emakhaya kumele luqakathekiswe njalo kuqhutshwe umkhankaso obanzi wokufundisa abesilisa ukuthi induku kayakhi muzi.

Abanye abesifazana bakhala ngokuthi imithetho yelizwe iphatha abadlwenguli labesilisa abahlukuluza kumbe abatshaya omkabo ngesandla esibuthakathaka.

Umkhankaso we16 Days of Activism Against Gender-Based Violence uqale mhlaka 25 ngenyanga edluleyo njalo uphela ngoMvulo. EZimbabwe unanzwe phansi kwendikimba ethi “Stop Gender-Based Violence at Work Places.

Abalwela amalungelo oluntu bathi ukuhlukuluzwa kwabomama ngendaba zocansi emsebenzini sokuyinsakavukela umchilo wesidwaba eZimbabwe; yikho nje uhulumende ekhethe lindikimba lonyaka.

please wait

No media source currently available

0:00 0:04:28 0:00

Facebook Forum

XS
SM
MD
LG