Umsekeli kamphathintambo obona ngokwethulwa kwemibiko uMnu Energy Mutodi uthi isinqumo sabatshutshisi baseSouth Africa, esokuthi uNkosikazi Grace Mugabe kumele abotshwe engeza kulelolizwe sijonge ukuyangisa uMnu Robert Mugabe.
Ngokunjalo, uthi uhulumende weZimbabwe kasoze akuvumele lokhu. Ugatsha olubona ngokutshutshisa amacala kweleSouth Africa olweNational Prosecuting Authority solwazise amapholisa ukuthi kumele abophe uNkosikazi Mugabe engavele elugxobe kulelolizwe phezu kwecala alidala nyakenye elokutshaya omunye untombazana ayemthole elamadodana akhe ehoteleni, uGabriela Engels.
Kodwa uMutodi uthi uhulumende weZimbabwe kasoze akuvumele lokhu.
Phansi kwesivumelwano se Interpol, esokusebenzelana kwamapholisa amazwe atshiyeneyo, eleZimbabwe kumele libophe uNkosikazi Mugabe limnikele amapholisa akwele South Africa.
Ukuhlaziya loludaba sixhume ingcwethi kwezombusazwe uMnu Zenzo Nkomo.
"Okwakuqala asikhangele ukuthi hlobo bani lwesigangi eskhuluma ngaso. Yisigangi esingafani lezinye nje izigangi ezijwayelekile. Yisigangi kade singu first lady welizwe," kutsho uNkomo.
Uthi ngalokho bekulobuhlobo obukhulu kade buvele bukhona ngaphansi kombuso wendoda yakhe okwenza kungabi lula ukuthi abotshwe.
