Kulabantu abadutshulwe ngamapholisa bafa koBulawayo laseHarare izolo ngesikhathi betshengisela phezu kokukhwela kwentengo yamafutha ezimota.
Ukutshengisela lokhu kubangele udlakela abanye batshisa izimota zamapholisa lezabantu nje makhaza.
Lanxa abanye bebetshengisela ngokuthula, kulabanye abavuke ubhova bagqekeza ezitolo bantshontsha ukudla kanye lempahla etshiyeneyo.
Imifanekiso egcwele enkundleni zokuxhumana iveza omunye owesilisa koBulawayo ethwele inkalakatha yomhlubulo wenkomo ehlombe.
Omunye ngobentshontshe ikhuba lokulima. Izitolo ezigqekeziweyo zigoqela ezeChoppies, amakhemisi lezinye ezitshiyeneyo.
Amahofisi amakhulu ebandla leMDC elikhokhelwa nguMnu Nelson Chamisa eHarare lawo atshisiwe ngabantu abanakanelwa ukuthi ngabasekeli beZanu PF.
Umphathintambo obona ngokuvikelwa kwelizwe oweState Security uMnu Owen Ncube ukufakazile ukuthi bakhona abantu abafileyo lanxa engatshongo ukuthi bangaki.
Uhulumende uthi udlakela lolu lubangelwe yiMDC ibambene labenhlanganiso ezizimeleyo ezigoqela eyeZCTU, eyiyo eqoqe uhlelo lokukhala umsebenzi.
Isiphathamandla seZCTU uMnu Ambrose Sibindi ukhuthaze uzulu weZimbabwe ukuthi engayi emsebenzini njalo namuhla lakusasa.
Inhlanganiso yamagqwetha alwela amalungelo oluntu eyeAbammeli isisole amapholisa lamabutho ngokudubula lokutshaya abantu izolo.
Umqondisi walinhlanganiso uMnu Tineyi Mukwewa uthi lanxa besola abantu ababangele udlakela lolu, babeka amapholisa umlandu ngoba yiwo angakwazanga ukuwuphatha kuhle umumo.
Kusenjalo, inhlanganiso yeZimbabwe Lawyers for Human Rights ithi amaphlisa lamasotsha angenele abantu ezindlini zabo eMabvuku laseChitungwiza izolo ebusuku ehamba ebatshaya mahlayana nje.
Inhlanganiso le ithe ilakho ukuya emthethwandaba nxa uhulumende engehluleka ukumisa ubudlova lobu.
Lanxa inhlanganiso yeZCTU ikhuthaza abantu ukuthi bakhalale umsebenzi ngokuhlala ezindlini, ukutshengisela ezitaladeni kulakho ukuqhubeka njalo namuhla.
Sikhuluma nje kubikwa kulabasakhulayo koBulawayo abagcwele ezitaladeni abavale imigwaqo ukuze amakhombi engaze athwala uzulu.
Abasakhulayo laba babikwa belele emigwaqweni abanye babo benatha utshwala ababuntshontshe ezitolo ezigoqela ezakoChoppies. Le yinto esolwe kakhulu lilunga leZanu PF uMnu Joseph Tshuma.