Uzulu weZimbabwe ulokhe engenelisi ukungena enkundleni zokuxhumana ezifana leWhatsapp, iFacebook leTwitter kulandela ukuvalwa kobulembu be-internet nguhulumende izolo.
Le yinto esolwa kakhulu zinhlanganiso zabalwela amalungelo oluntu emhlabeni jikelele ezifana leyeAmnesty International kanye leHuman Rights Watch zona eithi ukuvalela uzulu inkundla lezi yikwephuma amalungelo akhe.
Uhulumende ulaye amankampani encingo agoqela eyeEconet ukuthi avale i-internet ngenjongo yokwenqabela abantu ukuthumelana imbiko ngokwenzakalayo phezu kokukhalala umsebenzi okuqoqwe yinhlanganiso yeZCTU okuqhubekayo.
Abalwela amalungelo oluntu bathi uhulumende uzama ukuvimba ubufakazi bocuku olwenziwa ngamapholisa lamasotsha wona abikwa ebulele abantu abafika itshumi ekade betshengisela ezitaladeni phakathi kwamalanga amabili edluleyo.
Omunye wabo nguNkosazana Kimberly Bhebhe yena othi uhulumende weZanu PF uqhubeka esephuma amalungelo oluntu ngendlela abevele esenza ngayo ngesikhathi sikaMugabe.
Kusenjalo izizalwane zeZimbabwe ezihlala kweleSouth Africa lazo sezisole uhulumende ngokuvala ubulembu be-internet zisithi kazisenelisi ukuxhumana lezihlobo labangane zizwe ukuthi bayaphila yini njengoba kulodlakela olungaka elizweni; kubike uBennedict Nhlapho