Umfundisi odume ngokuphikisa umbuso weZanu PF uMnu Evan Mawarire uzamiswa emthethwandaba kamantshi namuhla esetheswa icala lokutshotshozela udlakela.
UMawarire ngomunye wabantu ababambane lenhlanganiso yeZCTU ekuqoqeni ukukhalala umsebenzi okuqale ngoMvulo abantu bekhonona phezu kokukhwela kwentengo yamafutha ezimota.
Amagqwetha akhe athi uMawarire uzalilandula lelicala.
Abantu abangena kumakhulu bavalelwe ezitokisini sikhuluma nje phezu kwamacala okuphatheka kudlakela kumbe ukweba ezitolo ngesikhathi sokutshengisela ezitaladeni ngoMvulo.
Amapholisa lamasotsha abikwa ebulele abantu abaphakathi kwabayisithupha letshumi, ngokutsho kwabalwela amalungelo oluntu.
Banengi njalo ababotshiweyo endaweni ezitshiyeneyo abagoqela amalunga eZanu PF, aweMDC labantu nje makhaza abazamiswa enkantolo kuliviki.
Inkulungwane zibikwa ziselatshwa amanxeba okutshaywa lokudutshulwa ngamapholisa lamasotsha. Inengi lithukuthele kakhulu ngocuku lukahulumende.
USithandekile Mhlanga weStudio 7 uxoxe lokhansila weHarare eDzivarasekwa uMnu Thamsanqa Gilbert Hadebe eseBelvedere Medical Center izolo ebusuku lapho athe bekugcwele abantu abalimeleyo abagoqela abantwana lasebeluphele.
Wengeze wathi abanye bebelamanxema enhlamvu zemibhobho.
