Umthethwandaba weHigh Court namuhla uzahluza udaba olukhwezwe yinhlanganiso yeMisa Zimbabwe leyeZimbabwe Lawyers for Human Rights ziphikisa ukuvalwa kobulembu be-internet nguhulumende.
Inhlanganiso lezi zithi inyathelo likahulumende leli kalikho emthethweni njalo lephula ilungelo loluntu.
Uhulumende uqale ukuvala ubulembu be-internet ngeviki ephelileyo kulandela ukukhalala umsebenzi okwakuqoqwe yinhlanganiso yezisebenzi eyeZCTU.
Ukuvalwa kwe-internet lokhu sokubangele ukuthi uzulu ehluleke ukuxhumana enkundleni ezifana leWhatsApp, iFacebook kanye leTwitter.
Abalwela amalungelo oluntu bathi ngokuvala ubulembu lobu, uhulumende uzama ukwenqabela amazwe omhlaba ukuthi abekwazi ucuku olwenziwa ngamasotsha lamapholisa, wona aqhubeka etshaya abantu mahlayana.
Sikhuluma nje banengi abazamiswa emthethwandaba kuliviki bemanxebanxeba ngemva kokudutshulwa kanye lokutshaywa ngabomthetho laba.
Ibandla leMDC, lona elilamalunga amanengi abotshiweyo kumbe adingwayo, selisole inhlanganiso yeAfrican Union leyeSADC ngokwehluleka ukungenela kuloludaba.
Sixoxe lomgcinisihlalo walelibandla uNkosazana Thabitha Khumalo.
