Ukufuthelana sokufike kuzinga elibi elizweni phezu kochuku lwamasotsha lamapholisa wona aqhubeke engenela abantu ezindlini eHarare lakoBulawayo izolo ebabhaxabula kabuhlungu.
Banengi ababikwa betshayiwe emalokitshini akoBulawayo agoqela eMpopoma laseMagwegwe izolo ebusuku.
Kuthange koBulawayo njalo amasotsha la angenele abantu emalokitshini afana leMabuthweni atshaya abantu mahlayana, ikakhulu abesilisa njalo abanye babikwa belimele kakubi.
Bakhona ababikwa sebechema igazi ngemva kokutshaywa lokhu. Edolobheni leHarare lakho kubikwa kungesifanayo.
Abalwela amalungelo oluntu abanengi babalekile ezindlini zabo ngoba bedingwa ngamehlo abomvu besetheswa icala lokuqoqa udlakela olwaba khona ngesikhathi sokukhalala umsebenzi ngeviki edluleyo.
Lanxa ikomitshini ebona ngezamalungelo isithi abantu ababulawe ngamasotsha lamapholisa bayisitshiyagalombili, abanye bathi bayedlula khonapho khatshana.
USithandekile Mhlanga weStudio 7 uxoxe lesiphathamandla seMDC koBulawayo uMnu Felix Magalela Mafa yena othi amalunga ebandla lakhe amanengi secatshile kweleSouth Africa.
