amalinks wokungena

Breaking News

Iphalamende Iyavulwa Amalunga eMDC Amanengi Esezitokisini Njalo Amanye Ecatshile Ngoba Edingwa Ngamasotsha


Idale lephalamende liyavulwa namuhla amalunga eMDC amanengi ecatshile ngoba edingwa ngamapholisa lamasotsha kuthi amanye avalelwe ezitokisini.

Ababotshiweyo laba betheswa icala lokutshotshozela udlakela olwaqhamuka ngesikhathi sokukhalala umsebenzi okwakuqoqwe yiZCTU kumaviki amabili adlulileyo.

Ngokunjalo, ibandla leli lithi kalilaqiniso lokuthi amalunga alo azahamba ephalamende.

Amalunga eMDC abotshiweyo agoqela uMnu Amos Chibaya, uMnu Settlement Chikwinya labanye. Abadingwayo bagoqela uNkosazana Thabitha Khumalo loNkosazana Joana Mamombe.

Banengi njalo abenhlanganiso ezizimeleyo ababaleke elizweni njengamalunga ebandla leMDC abadingwa ngamehlo abomvu.

Ukufuthelana khona kuya kuqhela elizweni phezu kokuhlukuluzwa kwabantu ngamasotsha lamapholisa inengi selizibuza ukuthi kambe kuyophetha ngani.

Udaba oluthukuthelise abantu abanengi ngolokubanjwa iganyavu kwabesifazana ngamasotsha endaweni zelizwe ezitshiyeneyo.

Kodwa umphathintambo kahulumende obona ngokwethulwa kwembiko uNkosikazi Monica Mutsvangwa uthi kumele bonke abesifazana abadlwengulwa ngamasotsha la kumbe ngamapholisa bayemangala emapholiseni ukuze bathole usizo.

Uthi okwamanje kulodaba olunje olulodwa kuphela olwaziwayo njalo olusaphenywa eChitungwiza.

Wengeze wathi abamangalayo bazavikelwa ngumthetho njalo baphathwe ngendlela elesithunzi kungatsha ezitholakala enkambeni zamapholisa elizweni ezamaVictim Friendly Units, ezikhokhelwa ngabesifazana.

Lokhu kwenzakala ngesikhathi uMongameli Mnangagwa esithi udangele ebona ivideo yamasotsha ehlukuluza abantu ekhitshwe ngumsakazo weSky News.

Uthe njalo uselaye amapholisa ukuthi abophe ipholisa lesotsha eliku-video le.

Ukuhlaziya indlela ibutho eliziphatha ngayo kulezinsuku, uSithandekile Mhlanga weStudio 7 uxoxe loMnu Max Mnkandla, owalwa kumpi yenkululeko ekuviyo leZipra, njalo owayelilunga lebutho lelizwe.

Kusenjalo amagqwetha athi azatshengisela ezitaladeni zeHarare namuhla esola ukwephulwa kwamalungelo oluntu ngamasotsha lamapholisa wona abulale abantu abalitshumi lambili kunsukwana ezedluleyo njalo aqhubeka ehlukuluza uzulu.

Ukutshengisela lokhu kuqoqwe yinhlanganiso yeLaw Society of Zimbabwe njalo amagqwetha la azatshengisela esuka ehofisini yalinhlanganiso esiya enkantolo yeConstitutional Court.

please wait

No media source currently available

0:00 0:02:59 0:00

Facebook Forum

XS
SM
MD
LG