UMongameli Emmerson Mnangagwa izolo ukhethe idale labacebisi bakhe abangamatshumi amabili lasithupha eligoqela osomabhizimusi, izikhwicamfundo kanye labezokholo.
UMnangagwa uthi abantu laba bazameluleka ekucandeni umhlahlandlela wentuthuko lokuchasisa inhlelo zikahulumende phansi kwendikimba ethi ‘Zimbabwe is Open for Business.’
Abacebisi laba bagoqela osomabhizimusi, uNkosikazi Devine Ndlukula loMnu Busisa Moyo, uDr. Kuzvinetsa Nzvimbo kanye lomfundisi uDr. Kenneth Mtata yena ophange wethula umbiko esithi kasoze asamukele isikhundla lesi.
Abanye ngabathi uMnu Trevor Ncube, yena olamaphephandaba achohoza uhulumende agoqela eleNewsday leleZimbabwe Independent kanye loMnu Shingi Munyeza, ongusomabhizimusi abuye njalo abe ngumfundisi.
Ukuhlaziya loludaba uChris Gande weStudio 7 uxoxe lengcwethi ecubungula ezombusazwe, uMnu Zenzele Ndebele yena osole inani labacebisi bakaMnangagwa laba esithi banengi kakhulu.
