Uzulu uthi ukukhwela kwentengo yokudla kanye lempahla ezitshiyeneyo sokwenze impilo yaba nzima ngokuphindiweyo.
Lokhu kuza ngemva kokuqonga kwentengo yesinkwa ngempelaviki isuka ku$1.40 isiya ku$2.50.
Osomabhizimusi bathi ukukhwela kwentengo yamafutha ezimota ngenyanga edluleyo yikho okwenze bakhuphula intengo yezinto abazithengisayo.
“Akusaphileki lapha eZimbabwe. Ezitolo akuthengeki lutho kanti lezikolo lakho imali yemfundo asilayo,” kutsho isakhamuzi seKezi esikhethe ukubizwa kuphela ngokuthi nguNcube.
Kusenjalo, inengi selisole uMongameli Emmerson Mnangagwa ngokuthi akalaso isifiso sokukhulumisana lomkhokheli weMDC uMnu Nelson Chmisa ukuze kulungisiswe umnotho welizwe.
UMnangagwa wethule amazwi la ngeviki edluleyo.
Ingcwethi kwezombusazwe uMnu Dinizulu Macaphulana utshele iStudio 7 ukuthi ngokwala ukukhulumisana loChamisa, uMnu uMnangagwa uveza sobala ukwehluleka kwakhe njengombusi.