Umeli weChegutu West edale uMnu Dexter Nduna, umangalele umeli weNorton uMnu Temba Mliswa emthethwandaba ngoLwesibili esithi ungcolise ibizo lakhe emphakathini.
Ngokunjalo, uNduna uthi ufuna uMliswa amhlawule izigidi zamadola ezilitshumi, i$10 million.
UNduna ulilunga leZanu PF kuthi uMliswa ulilunga elizimeleyo.
Ababili laba baphose batshayana ngoMvulo ngemva kokuba uMliswa ethe uNduna ulisela elantshontsha i$11 million kugatsha lukahulumende olubona ngokulungiswa kwemigwaqo olweZinara.
Lokhu kucunule uNduna yena osuke wethusela uMlisa esithi uzambulala ngoba evele engumbulali odumileyo olezidumbu ezinengi phansi.
UMliswa uphendule wathi uzathela uNduna ibhadiza amthene abe yinkabi.
Emaphepheli afikiswe ngamagqwetha akhe enkantolo, uNduna uthe uMliswa ungcolise igama lakhe ephalamende waqhubeka njalo phandle kwalelidale ngokutshela intathelizindaba ukuthi ulisela.
Ngokunjalo, uNduna uthi kumele uMlisa ahlambe igama lakhe nge$10 million. Akukaziwa ukuthi udaba lolu luzathethwa nini.