UMongameli Emmerson Mnangagwa wethule umbiko wokukhumbula umuyi uMnu Morgan Tsvangirai ngoLwesine esithi wayengumuntu owayezinikele kakhulu elizweni lakhe njalo elwela ukubambana kanye lombuso okhululekileyo.
Ngokunjalo, uMnangagwa uthe kuqakathekile ukuthi uzulu weZimbabwe abambe iqhaza ekwakheni ilizwe.
Abanengi abaphendule umbiko kaMnangagwa enkundleni yeTwitter bamchothozile besithi kuyabamangalisa ukuthi usengakhuluma kuhle ngoTsvangirai namuhla khona uhulumende wakhe webandla lakhe leZanu PF wayehlala emhlambaza esithi ungumthengisi kanti njalo embopha njalo nje.
Komunye umnyaka uMnu Tsvangirai, yena obhubhe nyakanye ngemva kokulwisana lomkhuhlane wemvukuzane okwesikhathi eside, watshaywa ngamapholisa waphosa wafa.
Umgcinisihlalo weMDC uNkosazana Thabitha Khumalo utshele iStudio 7 ukuthi amazwe kaMnangagwa ayabamangalisa.
Kolunye udaba, idala lephalamende seliqale uhlelo lokukhetha amalunga ekhomishini ebona ngokulwisana lenkohlakalo, eyeZimbabwe Anti-Corruption Commission.
Umlawuli wephalamende wethule umbiko ngoLwesine ekhuthaza uzulu ukuthi akhethe abantu afuna babe ngamalunga alikhomishini njalo athumele amabizo abo kuleli dale.
Amalunga amakhomishini akhethwa nguzulu abe ebe esevivinywa yiphalamende.
