amalinks wokungena

Breaking News

EU: Izijeziso Esazethesa uMugabe, uGrace Lenkampani Kahulumende Elungisa Izikhali Zempi Zizaqhubeka Zikhona


Umanyano weEuropean Union uthi izijeziso owazethesa uMnu Robert Mugabe, umkakhe uGrace kanye lenkampani kahulumende elungisa izikhali zempi eyeZimbabwe Defence Industries zizaqhueka zikhona okomunye njalo umnyaka.

Isinqumo lesi sithethwe ngabaphathintambo balumanyano ababona ngobudlelwano beEU lamanye amazwe emhlanganweni wokuhlaziya udaba lwezijeziso lezi ngoMvulo.

Abaphathintambo laba banqume njalo ukuthi izijeziso ezetheswa umsekeli kaMongameli uMnu Consntantino Chiwenga, umholi wamabutho uMnu Philip Valerio Sibanda lomphathintambo obona ngezokulima uMnu Perrence Shiri zizaqhubeka zifakwe eceleni.

Lokhu kutsho ukuthi izijeziso zabathathu laba kazesulwanga ngokugcweleyo, okutsho njalo ukuthi zilakho ukuvuselwa yiloba nini kungaba lesidingo.

I-European Union yesule izijeziso eyazethesa owayehola ugatsha lwamacuphi olweCIO, uMnu Happyton Bonyongwe lowayengusikomitshi wamapholisa uMnu Augustine Chihuri ngoba bengasekho kuhulumende.

Lanxa iBhilithane yayithe umanyano lo ulakho ukujezisa amalunga kahulumende amatsha phezu kokubulawa lokuhlukuluzwa kukazulu ngenyanga edluleyo, akusenzakalanga lokhu.

Ukuhlaziya loludaba sixoxe lengcwethi kwezombusazwe uMnu Effie Dlela Ncube yena othe isinqumo seEU lesi siveza ukuthi umanyano lo awukabi leqinis lokuthi uluphathe njani kahle-kahle udaba lweZimbabwe.

please wait

No media source currently available

0:00 0:02:32 0:00
XS
SM
MD
LG