Umphathintambo wezemithetho uMnu Ziyambi Ziyambi utshele umhlangano weUnited Nations obuhlaziya indaba zamalungelo oluntu eGeneva, kweleSwiterland, ngoLwesithathu ukuthi uhulumende weZimbabwe uyawalondoloza amalungelo kanti njalo uyawuhlonipha umbuso okhululekileyo.
UMnu Ziyambi uthe lokhu kuvezwa sobala yikwesulwa komthetho weAippa lowePosa, yona athi ibincindezela abantu ibathathela amalungelo abo.
Ngokunjalo, uthe uhulumende uzabumba imithetho emitsha elondoloza amalungelo oluntu ngokugcweleyo.
UZiyambi ukhulume njalo ngokutshengisela okwenzakale ngoZibandlela langelanga elalandela ukhetho esithi kwakuqoqwe yizitha ngenjongo yokuphehla umvukela zisebenzelana leMDC kanye labenhlanganiso ezizimeleyo.
Uthe ngokunjalo, uhulumende wayelungile ukubamba ababetshengisela ngendlela enza ngayo.
Uphethe njalo udaba lomnotho weZimbabwe esithi uzinzile njalo usebenza kuhle lanxa nje ethi uphazanyiswa yizijeziso ezetheswa iziphathamandla zikahulumende ngamazwe angentshonalanga.
Ngokunjalo, uthe lezozijeziso kumele zesulwe. Amazwi kaZiyambi agcizelelwe yisiphathamandla selizwe leNamibia elingumgcinisihlalo womanyano weSadc.
Ukuhlaziya loludaba sixhume ingcwethi kwezombusazwe uMnu Dinizulu Macaphulana yena othi ubufakazi obukhona bukhomba ukuba uhulumende kaMongameli Emmerson Mnangagwa ulokhe engawahloniphi amalungelo.
