EleZimbabwe limanyane lamanye amazwe omhlaba ngoLwesihlanu ekunanzeni ilanga labesifazana eleInternational Women’s Day uzulu ebuka imisebenzi emihle enziwa ngomama kunhlangothi zempilo ezitshiyeneyo.
Indikimba yalonyaka ibisithi “Balance for Better” njalo ikhuthaza ukulinganiswa kwamathuba phakathi kwabesifazana labesilisa.
Abesifazana abakhulume lomsakazo weStudio 7 bathe ilanga leli liyabajabulisa ngoba libenza bathole inhlonipho njalo bazigqaje, kubike intathelizindaba yethu uGibson Bhebhe.
Imicimbi yokuthakazelela lelilanga iqhutshelwe endaweni ezitshiyeneyo ezigoqela eHarare lapho omama abanengi abaveze ukudana ngobunzima ababhekane labo empilweni ngenxa yokubhidlika komnotho.
Ngokubika kwentathelizindaba yethu, uMavis Gama, umkhokheli webandla leMDC uMnu Nelson Chamisa laye unanze lelilanga ekhuza uMongameli Emmerson Mnangagwa ukuthi akhulumisane laye balungisise ubunzima obuhlangana lozulu.
KoBulawayo khona abesifazana bananze ilanga leli ngokutshengisela ezitaladeni njalo beqhuba imihlangano ngenjongo yokulwisana lokuhlukuluzwa kwabomama ezindlini; kutsho intatheli yethi uAnnahstacia Ndlovu.