Isigaba seMatabeleland South izolo sikhethe uMnu Nelson Chamisa ukuthi abe nguye ozancintisa esikhundleni akuso kuCongress yeMDC ezakwenzelwa eGweru ngenyanga ezayo.
Isigaba lesi sikhethe njalo uMnu Welshman Ncube, uMnu Tendai Biti loMnu Morgan Komichi ukuthi babe ngabasekeli bakaChamisa.
UNkosazana Thabitha Khumalo yena ukhethwe ukuba ahlale engumgcinisihlalo walelibandla kuthi uDouglas Mwonzora laye eqhubeke engunobhala jikelele.
Izinqumo lezi zithethwe ngabasekeli beMDC eMatabeleland South ngemva kokuqhutshwa komhlangano wokukhetha inkokheli yalesisigaba entsha, oweProvincial Congress.
Isigaba seMDC kweleMelika laso sivote ngoMgqibelo saphuma lesinqumo esifanayo ngoChamisa. Kodwa akulasikhundla lapho isigaba lesi esifake khona uMwonzora, yena obikwa eloyisa ukuncintisana loChamisa.
Ekhuluma eseGwanda izolo uMnu Chamisa ubonge abasekeli bakhe ngendlela abaziphathe ngayo esithi ulethemba lokuthi ukuthula kuzaqhubeka kukhona elizweni.
Ibandla leMDC lizaqhuba ukhetho lokudinga inkokheli yalo yeMatabeleland North ngoLwesibili lapho isigaba lesi laso esizakhetha esifuna bancintise kuCongress yebandla ngenyanga ezayo.
