Ibandla leMDC lithi lizavumela abakhethwe yizabelo zalo ukuthi bakhankase maduze nje bedinga usekelo ngaphambilini kokhetho lokudinga abakhokheli abatsha emhlanganweni walo weCongress ngenyanga ezayo eGweru.
Izabelo zalelibandla ezilitshumi lambili seziqedile uhlelo lokukhetha labo ezifuna bancintise kuCongress bedinga izikhundla ezitshiyeneyo.
Umkhokheli walelibandla uMnu Nelson Chamisa ukhethwe yizabelo zonke lezi ukuthi eqhubeke esesikhundleni sakhe. Okwamanje akekho okhethiweyo ukubana ancintisane laye. Isabelo esesisele ukuthi senze olwaso ukhetho ngeseSouth Africa kuphela.
Abazancintisa ezikhundleni zokuba ngabasekeli bakaChamisa abathathu babalisa uMnu Welshman Ncube, uMnu Morgan Komichi, uMnu Elias Mudzuri, uNkosikazi Lilian Timveos loMu Tendai Biti.
Bonke abancintisayo bazavunyelwa ukukhankasa emphakathini isigaba seSouth Africa singaqhuba ukhetho lwaso. Sixoxe lesikhulumeli sikaMnu Chamisa uDr Nkululeko Sibanda.
