amalinks wokungena

Breaking News

EleMelika Kuhulumende weZimbabwe: Kuhle Okuphuma Emilonyeni Yenu Kodwa Liyasilela Ngezenzo


EleMelika lithi uhulumende kaMongameli Emmerson Mnangagwa usahamba ngonyawo lwakudala njalo ukhanya engazimiselanga ukuletha inguquko kwezombusazwe ngoba eqhubeka ngokuhlukuluza uzulu weZimbabwe lokwephula amalungelo akhe.

Lokhu kuphume emhlanganweni oqoqwe yinhlanganiso yeCenter for Strategic & International Studies khonapha eWashington DC namuhla ngenjongo yokuhlaziya umumo wendlala eZimbabwe.

Ekhuluma emhlanganweni lo, umsekeli kamabhalane obona ngobudlelwano bukahulumende weMelika lamazwe aseAfrica, uAmbassador Mathew Harrington uthe uhulumende weZanu PF lokhe esehluleka ukuhlonipha amalungelo oluntu njalo ehlukuluza abaphikisana laye.

“Ukuhlukuluzwa kwabenhlanganiso ezizimeleyo, intathelizindaba, abenhlanganiso zezisebenzi labamabandla aphikisayo kuveza ukuthi uhulumende weZimbabwe usahamba ngonyawo lwakudala; akulanguquko esibekhona kwezombusazwe,” kutsho uHarrington.

“Kodwa siyavuma ukuthi akhona amanyathelo abukekayo asewathethe uhulumende kwezenotho… Kumele ngikutsho ukuthi ukuphumelela kweZimbabwe kuzakwenzakala kuphela nxa kungaba lenguquko kwezombusazwe. Okudanisayo yikuthi asiyiboni linguquko. Uhulumende ukhuluma okuhle, kodwa uyasilela ngezenzo.”

UAmbassador Harrington wengeze wathi nxa uhulumende weZimbabwe efuna ukuletha inguquko eqotho njalo efuna ukwamukelwa yizizwe zomhlaba ngezandla zombili, kumele esule imithetho encindezelayo efana lePosa kanye leAippa.

Uhulumende uthi seqalisile ukuwuguqula umthetho wePosa kodwa abebandla leMDC bathi inguquko le kayitsho lutho ngoba umthetho omutsha obunjwayo, ulokhe usenqabela inkululeko kazulu.

Omunye obesemhlanganweni lo ngumcebisi kahulumende weZimbabwe njalo eyingcwethi kwezombusazwe uMnu Ashok Chakravarti yena okhale ngomthetho owethulelwa uhulumende weZimbabwe yiMelika oweZimbabwe Democracy and Economic Recovery Act, esithi uphazamisa uzulu njalo uvimba intuthuko.

Uthe umthetho lo wenqabela abatshli bezimali ukuzevula amabhizimusi eZimbabwe.

“Umthetho weZidera uvimba eleZimbabwe ukuthola usizo kunhlanganiso eziphathisa amazwe omhlaba ngemali. Nxa ucabanga ukuthi umthetho lo kawula mthelela omubi kuzulu wezimbabwe, kahle ngikutshele ngokwangehlelayo mina,” kutsho uMnu Chakravarti.

“Ngilomntwana ofunda khonapha eMelika; ngike ngazama ukumthumela imali yesikolo efika ku$4,000 nyakenye kodwa ngehluleka ngenxa yezijeziso. Ibhanga lathi libona imali le lahle layivimba ngenxa yezijeziso zenotho.”

Kodwa isiphathamandla senhlanganiso yeU.S Agency for International Development (USAID), eZimbabwe uMnu Jason Taylor ukulandule lokhu esithi okwenqabela ingqulaphambili eZimbabwe yikwehluleka kukahulumende ukuguqula izenzo zakhe.

“Okwenqabela abatshali bezimali eZimbabwe yikwehluleka kukahulumende ukwethula inguquko ezwayo kwezenotho, ukungahlonitshwa kwempahla yabantu, ukungabikhona kwenguquko kwezombusazwe lokungahlonitshwa kwamalungelo oluntu,” kuchasise uMnu Taylor.

“Ukuvika ngezijeziso zenotho yikwehluleka ukukhuluma iqiniso, okwenza kube nzima ukuthi uhulumende alungisise okudinga ukulungisiswa.”

Uhulumende weMelika uthi lanxa engavumelani lohulumende weZimbabwe kundlela amele ayilandele ukuze ilizwe libuyele esimeni esihle lomnotho walo uthuthuke, uzaqhubeka ephathisa uzulu ngenhlelo zentuthuko ezitshiyeneyo ezigoqela ukuphathisa abalambayo ngokudla.

please wait

No media source currently available

0:00 0:04:47 0:00

Facebook Forum

XS
SM
MD
LG