Abasakhulayo bakoBulawayo abalikhulu elilamatshumi amathathu lanye, 131, ababotshwe ngoMgqibelo ngemva kokutholakala besenza ukuganga emagigini abizwa ngokuthi ngamaVuzu bazamiswa emthethwandaba namuhla.
Amapholisa athi athole abasakhulayo laba besenza yonke inyakanyaka yokungezwa egoqela ukunatha utshwala lokubhema izidakamizwa.
Abanye babikwa bebehlome ngezikhali ezifana lama-screw driver lengqamu zohlobo lweOkapi, kuthi abanye ngabatholakale belamaCondom asebenzileyo.
Amapholisa athole njalo amaphilisi asetshenziswa ngebesilisa ukwenyusa umdlandla wocansi (umvunsankunzi).
Umsakazo weZBC uthi phakathi kwababotshiweyo laba, abalitshumi lanhlanu ngamantombazana. Omncane wabo uleminyaka yokuzalwa elitshumi lantathu, 13.
Sixoxe lomeli weMakokoba edale lephalamende uMnu James Sithole yena osole abazali esithi bakhanya bengazimiselanga ukukhuza abantwana.
