Umeli weGlen View South edale lephalamende uNkosikazi Vimbai Tsvangirai-Java, oyindodakazi kamuyi uMnu Morgan Tsvangirai, ulaliswe esibhedlela ngemva kokulimala kakubi engozini yemota ngoMvulo ebusuku eKwekwe.
Ababili ekade behamba laye njalo bengamalunga ebandla leMDC njengaye, uMnu Paul Rukanda loMnu Tafadzwa Munzwa bafele kulingozi.
Isikhulumeli seMDC uMnu Jacob Mafume utshele iStudio 7 ukuthi lanxa uNkosikazi Tsvangirai-Java esesimeni esibi, balethemba lokuthi uzasila.
Umkhokheli walelibandla uMnu Nelson Chamisa uthe udanile ngokubhubhwa kukaRukanda loMunzwa. Uphinde wabonga odokotela labongi beKwekwe General Hospital ngokwelapha uNkosikazi Tsvangirai.
UMongameli Emmerson Mnangagwa laye wethule umbuko ekhalela imuli zabafi njalo efisela uNkosikazi Tsvangirai-Java ukusila ngokuphuthuma.