Umkhokheli webandla leZapu, uMnu Dumiso Dabengwa, sephiwe inhlonipho yokuba liqhawe lesizwe, iNational Hero.
Isidumbu sakhe besimele sifike koBulawayo ngeSonto sivela kweleSouth Africa, kodwa asisafikanga ngoba ibhokisi lakhe lehlule ukungena endizamtshineni yeSA AirLink.
Abantu abangena kumakhulu ababuthane eJoshua Mqabuko Nkomo International Airport ukuyahlangabeza isidumbu sikaDabengwa basuke bedanile. Abomndeni wakhe bathi sesizabuya kusasa.
Ekhuluma lentathelizindaba, umsekeli kaMongameli welizwe uMnu. Kembo Mohadi ibandla lakhe likubone kufanele ukuthi liphe uMnu Dabengwa inhlonipho yeqhawe ngoba ngempela eliqhawe lamaqhawe.
“Sivumelene ukuthi uDabengwa aphiwe isicoco sokuba liqhawe lesizwe, kungakho ngilapha ukuzobikela imuli lezihlobo zakhe ngalokhu njalo uzabekwa ngendlela amaqhawe akuleli abekwa ngayo,” kutsho uMohadi.
Ngemva kokusuka egcekeni lendizamtshina uzulu ulubhekise endlini kaDabengwa eFourwinds lapho ilunga lomndeni uMnu. Gibson Sibanda elibike khona ukuba isidumbu sesizafika kusasa lokuthi umsebenzi uzahamba njengokuhlelwa kwawo.
UDabengwa ubhubhele kweleKenya ngoLwesine esendleleni yokuza ekhaya esuka eIndia lapho akade eselatshwa khona.
