amalinks wokungena

Breaking News

Kuzenziwa Isikhumbuzo Sika Dabengwa eWhite City Stadium Andubana Angcwatshwe eNtabazinduna


UMnu. Dumiso Dabengwa

Umuyi uMnu. Dumiso Dabengwa obhubhe ngoLwesine waphiwa inhlonipho yeqhawe lesizwe, uzabekwa ekhaya lakhe ngoMgibelo. NgoLwesihlanu kukhangelwe ukwenziwa isikhumbuzo enkundleni ye White City Stadium.

Kunjalo nje, ukubhubha kuka Dabengwa oliqhawe lempi yenkululeko, kutshiye inengi lezizalwane zeZimbabwe ezihlala kweleBotswana zidabukile, zisithi zilahlekelwe ngumuntu okade eqotho.

Inengi labakhulume leStudio 7 phezu kwempilo kamuyi uDr Dumiso Dabengwa, bavumelene ukuthi kade eyindoda emqotho, owazinikela ukulwela iZimbabwe ekhululekileyo engela bandlululo.

Umnunzana Cephas Tshuma, umgcinisihlalo wenhlanganiso ebona ngokulondolozwa kwamasiku esintu, eyeSibanye Cultural Society, uthi njengabantu besintwini bengaphandle kwelizwe, badabukile kakhulu ngokutshona kukaDabengwa.

"Njengabantwana bakoBulawayo, beZimbabwe, sizwa silahlekelwe kakhulu. Ubaba ubehlonitshwa hatshi eMatebeleland kuphela kodwa elizweni lonke. Njenge nhlanganiso yeSibanye sikhala kanye lemuli yako Dabengwa sisithi umlimu abaduduze kubuhlungu abaphakathi kwabo,” kutsho uTshuma.

Umnunzana Stan Ncube, owayelilunga leZAPU ngemva kukazibuse, uthi uDabengwa watshengisa ukuba yinkokheli engathandabuzwa, ngesikhathi sempi, langemva kwempi.

UTshuma uthe: "Watshengisela ukuba ngumkhokheli ohlonitshwayo ngesikhathi sempi, langemva kukazibuse. Noma wahlukuluzwa ngaphansi kombuso kaMugabe, kaze akhohlwe ukuthi yena umeleni, kwaze kwafika isikhathi sokuthi adlule emhlabeni."

Omunye osakhulayo osebenza eGaborone, uNkululeko Ndlovu, uthi sekuyisikhathi sokuthi kuphume abanye abazafana loDabengwa, ikakhulu ekukhulumeni abantu abakuluhlu lweMandebeleni.

"Ube eyindoda emadodeni. Sifunde okunengi. Okuqakathekileyo khathesi yikuthi kuphume abanye phakathi kwethu abafana lobaba uDabengwa, beqhubeke ngalokho akade ekumela," kutsho uNdlovu.

UDabengwa ubhubhele kweleKenya ngoLwesine lweviki edluleyo, esendleleni evela kwelatshwa kweleIndia.

Uhulumende umnike inhlonipho yeqhawe lesizwe, lokuba National Hero kodwa kasoke ancwatshwe emathuneni aweNational Heroes Acre, eHarare, uzabekwa emzini wakhe, lapho adabuka khona emaphandleni aweNtabazinduna.

please wait

No media source currently available

0:00 0:02:13 0:00

Facebook Forum

XS
SM
MD
LG