Abenhlanganiso ezilwela amalungelo oluntu labomanyano weEuropean Union sebechothoze ukuthunjwa lokutshaywa komkhokheli wenhlanganiso emela ababalisi bemaphandleni, eyeAmalgamated Rural Teachers Union of Zimbabwe, uMnu Obert Masaraure.
UMasaraure uthunjwe phakathi kobusuku ngoLwesithathu ngamadoda ayisithupha ayehlome ngemibhobho wazotholakala izolo etshaywe walimala kakubi.
Inhlanganiso yamagqwetha alwela amalungelo eyeZimbabwe Lawyers for Human Rights yethule umbiko isola uhulumende isithi inakanela ukuthi nguye oyenze lokhu.
Inhlanganiso le ixwayise njalo uhulumende ukuthi atshiyane lomkhuba wokuhlukuluza abantu ngendlela ayenze ngayo uMnu Masaraure ngoba kulicala eligavunyelwayo emhlabeni jikelele.
Umkhokheli weEuropean Union eZimbabwe uMnu Timo Olkkonen laye wethule umbiko enkundleni yeTwitter echothoza ukuthunjwa lokutshaywa kukaMasaraure.
Isehlakalo lesi size ngemva kokuba ababalisi abangamalunga enhlanganiso yeARTUZ bekhalele umsebenzi phezu kweholo eliphansi.
Njengobufakazo balokho okumehleleyo, uMasaraure wethule imifanekiso eveza amanxeba okubhaxabulwa emhlane njalo waphuma kuVideo ebhanditshe ikhanda lesandla.
Ekhuluma kuleyo Video uMasaraure ubonge uzulu weZimbabwe ngokuma laye wathembisa lokuthi uzaqhubeka elwela amalungelo ababalisi lokuthi bengezelelwe iholo engelakwesaba.
Kodwa umabhalane kugatsha lukahulumende olubona ngokwethulwa kwemibiko uMnu Nick Mangwana uwatshaye indiva amanxeba kaMasaraure esithi ngawakudala.
Walile njalo ukulukholwa udaba lokuthunjwa kwakhe esithi akulanto enjalo enzakeleyo.
Isiphathamandla seARTUZ uMnu Fortune Jamela yena uthe ukuhlukuluzwa kukaMasaraure akusoze kubethusele bacine bengasawameli amalungelo abo.
