Owake waba ngukhansila wakoMadlambudzi elilunga leMDC uMnu Thamani Ncube ubhubhele engozini yemota ndawonye lomunye abehamba laye esigabeni sakoMbimba, ePlumtree ngeSonto.
UNcube uhle waphelela kulingozi kwathi omunye wakhe wafela esibhedlela sePlumtree ngemva kokungqikilana kwemota ekade behamba ngayo leroli enkulu.
UNcube ubengumuntu osakhulayo njalo utshiye abantwana abancane lomkakhe. Ubevame ukuxoxa kakhulu lomsakazo weStudio 7.
Isikhulumeli sondeni wakhe, uMnu Difa Dube uveze ukuthi uNcube uzabekwa ngempelaviki. Wengeze wathi badabukile kakhulu ngokulahlekelwa ngomunye wabo ngendlela enje.
Kusenjalo, umgcinisihlalo weMDC eMatabeleland South uMnu Solani Moyo laye ubhewulwe yimota ePlumtree ngoMvulo.
Ibandla lakhe lithi kalimalanga kakhulu njalo impilo yakhe ayikho esimeni esibi.
Ngeviki edluleyo kubhubhe ilunga umeli weGlen View South, uNkosikazi Vimbayi Tsvangirai-Java, obelilunga leMDC ngemva kokulimala engozini yemota eyabulala abasekeli balelibandla ababili ngoNkwenkwezi.
Abanengi bathi esikhathini esinengi ingozi lezi zibangelwa yimigwaqo esesimeni esibi njalo bathi uhulumende kumele aphange ayilungise.
