amalinks wokungena

Breaking News

Uhulumende kaMnangagwa Uchothozwa yiMelika leILO Ngokuqhubeka Ehlukuluza Inkokheli Yezisebenzi


EleMelika selichothoze uhulumende weZimbabwe ngokuqhubeka ehlukuluza inkokheli yezisebenzi njalo esephula amalungelo ayo.

Linsolo igcizelelwe yinhlanganiso ebona ngezamalungelo ezisebenzi emhlabeni jikelele eyeInternational Labour Organization (ILO), emhlanganweni wayo oqhutshelwe eGeneva kweleSwiterland, ophele ngoMgqibelo.

Embikweni oqondane lokufikisa kweILO iminyaka elikhulu yasungulwayo, umabhalane obona ngobudlelwano beMelika lamanye amazwe omhlaba, uMnu Mike Pompeo uthe eleMelika likhathazeke kakhulu ngokuhlukuluzwa kwenkokheli yezisebenzi nguhulumende weZanu PF esebenzisa amasotsha lamapholisa.

Umbiko lo uza ngesikhathi umkhokheli wenhlanganiso emela ababalisi bemaphandleni eyeAmalgamated Rural Teachers Union of Zimbabwe (ARTUZ) uMnu Obert Masarawure evalelwe esitokisini.

UMasarawure ubotshwe ngoLwesihlani esetheswa icala lokwehluleka ukuhlonipha imigoqo ayifakelwa yinkantolo kwelinye icala elilokhe luphambi kwenkundla.

Umiswe emthethwandaba ngoMgqibelo udaba lwakhe lwadluliselwa phambili njalo uzaqhubeka evalelwe ebesebuyela emthethwandaba ngoMvulo.

Udaba lokwephulwa kwamalungelo ezisebenzi eZimbabwe luhlafunwe kabanzi emhlanganweni weILO, wona ongenwe yiziphathamandla zamazwe atshiyeneyo, okugoqela ezikahulumende weZimbabwe lezenhlanganiso yeZimbabwe Congress of Trade Unions (ZCTU).

Uhulumende kaMongameli Emmerson Mnangagwa usoliwe kakhulu kulumhlangano ngemva kokwalela iILO ukuthi ithumele iqula layo eZimbabwe ukuyazahlaziya udaba lokungahlonitshwa kwamalungelo ezisebenzi.

Lokhu kuvezwe ngunobhala jikelele weZCTU uMnu Japhet Moyo yena obesemhlanganweni lo.

please wait

No media source currently available

0:00 0:03:36 0:00

Facebook Forum

XS
SM
MD
LG